陳欣妍（Shirley）在電影《誤判》中首演大律師，跟一班猛料前輩甄子丹和張智霖（Chilam）等合作，她坦承拍攝時秒變「淆底獸」，但幸福地得到前輩悉心照顧。講到男友沈震軒（Sammy）年前接受本報訪問時，表明已有計劃求婚，只聞樓梯響，她幫口解釋因各有各忙，又讚Sammy100分，已認定男方，結婚是遲早的事。採訪：杜杜 攝影：孔子 髮型:Kenki 化妝:Ada
Shirley得知演大律師「李思敏」後相當興奮，但又擔心自己駕馭不到角色，「第1次演專業人士，同我本人反差好大，專業人士講所有嘢係好firm，會好清楚每一刻自己想表達啲乜嘢。」加上今次角色是奸角，令她要做更多準備，「我好鍾意演反派，可以好多嘢玩，我成日睇啲超級英雄嘅片，近年啲反派都唔會討厭佢，今次我都想表現到呢個反派，背後係有故事，令觀眾明白同理解佢點會咁做。」
感激前輩悉心照顧
Shirley拍《誤判》另一個考驗，就是初次跟大班猛料前輩合作，「第1次拍咁大製作，見到咁多好叻嘅前輩喺現場，我真實『淆底獸』一面就出返嚟，開頭仲要我係Chilam老闆要lead住佢。」第1場跟甄子丹拍對手，她已經驚到震不斷冒汗，「真係唞唔到氣，但係甄生好好，佢都睇得出我好緊張，問我使唔使飲杯咖啡先，因為佢帶咗部咖啡機去現場，我就趁機自我介紹，氣氛即刻好啲，佢仲叫我同佢試戲，真係太好啦！」至於跟Chilam不單有親熱戲，還要她做主動，令她緊張到前一晚瞓不到，但埋位時對方好照顧她，「佢會主動教我點做，仲搵咗導演兩個人男人試一次畀我睇，真係細心。」
講到男友Sammy接受本報訪問時表示有求婚計劃，但已事隔2年，追問Shirley進展如何？她即護住男友話：「唔好畀咁大壓力佢，如果我係佢會有好大壓力。」她坦承早已認定Sammy ，「我都要讚佢，佢係100分，我哋有晒共識，已經冇分大家。」她解釋只是近期各有各忙，仲要煩搬屋，「我哋上網有查過結婚嘅步驟有咁多，搬屋已經有好多嘢要諗，等忙完再慢慢諗，反正婚一定會結，希望到時有儀式感得嚟又簡單。」
