譚偉權（Gary）和曾慕雪早前開始拍檔主持香港電台第一台節目《港識生活館》，兩人雖然做了多年舞台劇演員，反而冇合作機會，難得在電台節目首度拍檔。作為電台主持新丁，他們雖然各有壓力和困難，但一樣搵到做幕前表演外另一種滿足感。採訪：杜杜
Gary和慕雪獲邀做主持時，兩人都頗意外，特別要做足5日節目的Gary，「以往都有做過主持，冇諗過會做電台固定主持，第1次好有新鮮感。」不過正式埋位時，一樣考起幕前經驗豐富的Gary，「最難係計時間收聲，初初真係好緊張，望住個鐘唔知幾時收口好，要做咗兩星期慢慢先算掌握到。」而一星期主持2日的慕雪，壓力冇咁大，「我負責周二《眾藝館》同周四《尋味館》，有Gary哥哥傍住我即刻冇咁驚，會覺得幾刺激。」
好快有默契
講到兩人初次合作，他們都覺得感覺很好，又異口同聲話：「估唔到我哋兩個做咗咁耐舞台劇，反而一直冇機會合作，第1次拍檔竟然是電台節目。」Gary讚慕雪性格開朗主動，好快便熟絡，「我哋真係唔使太多時間磨合，可能同佢性格有關，有啲咩都可以直接講。」慕雪就認為有Gary特別安心，「佢好似大哥哥咁照顧住我，可能大家做慣舞台劇都好識得執生，一個眼神就搞掂，好快已經有默契。」
節目每日有不同主題，亦會經常訪問不同的被訪者，慕雪認為跟幕前演出比較，又是另一樣滿足感，「電台嘅聽眾睇唔到要靠主持去講解，能夠用聲音表達到，都幾有滿足感。」Gary好認同，更覺得主持以來有不少得着，「周一至周五有不同主題，好似周一《時尚館》，以往我真係比較少留意時裝，同馮榕榕拍檔主持後，真係認識多咗好多呢方面知識。」慕雪來電台又多份親切感，「細個媽咪鄧拱璧返港台主持《輕談淺唱不夜天》會間中帶埋我，所以我喺度都有不少童年回憶。」
