現年56歲有「TVB御用爛仔」之稱的游飈，人生跑道荊棘滿途。他中三畢業便應徵臨時演員，曾經渴望成為演員的他，由日薪3元的臨記，慢慢成為電視台月薪一萬多元的演員；自2004年起，他開始轉換跑道開設「除甲醛」公司，一路走來起起跌跌，曾經高峰過，如今公司又再次面臨危機。游飈接受《星島頭條》訪問時笑言：「可能你下次搵我訪問時會問，游飈你冚咗旗喎！你嚟緊點生活呀！哈哈！」
游飈初入行見發哥狂飆汗
游飈笑言自己當年中三畢業看到聘請臨記演員的廣告而入行，雖然如今回頭看笑言是「被坤入行」，但他娓娓道來自己的演員路時，仍是笑容滿面。「嗰時𡃁仔唔識嘢，其實係畀人坤咗入行，我哋拍電影拍咗十幾個鐘都係40蚊咋！」游飈處男作是張國榮、張曼玉與梅艷芳主演的電影《緣份》，接住又參演《等待黎明》，當時他有幸見到周潤發和萬梓良，「見到發哥、萬子，緊張到真係出汗㗎！（嗰陣）喺西貢碼頭，成個海邊放滿車軚喺度燒，因為拍打仗，嗰時未知啲黑煙有毒，返屋企沖涼發現，嘩！洗頭啲水、鼻沖出嚟啲水、沖涼啲水全部黑色，好驚！幾年後我先知，原來燒車軚係有毒，想當年，要大煙（效果）都係搵兩個車軚係咁燒，咁就烽煙四起喇！當然後尾唔再用，但我都已經吸咗好多，好慶幸未死！哈哈！」
相關閱讀：「TVB御用爛仔」游飇罕現身談辛酸史 曾難以抽離想周街打人 淡出多年變老闆
游飈為慳錢 廣播道行去深水埗
游飈初入行當了6年的臨時演員，日薪40元，但他當時住在元朗，工資不高的他，倘遇凌晨收工便用奇招節省車費。「就算我之後去咗電視台做臨時演員，最早期亞視係30蚊十個鐘，TVB係35蚊十個鐘，梗係做TVB啦！亞視真係（人工）低之餘，仲要個服裝間都幾臭吓！嗰時我哋喺總台廣播道凌晨收工，佢出糧畀咗35蚊，我惟有由廣播道行去窩打老道，然後再行去太子道。因為金魚街凌晨5點就開，喺嗰度公園瞌陣，然後再行去深水埗同師傅飲茶，未夠9點就喺酒樓扮飲早茶，其實嗌完兩籠嘢之後就瞓到9點鐘醒，係要咁樣慳錢㗎！飲茶係師傅畀錢，陰公！我哋都係最低層捱出嚟！」
游飈首講對白震過貓王
游飈首次講對白是1986年拍TVB劇集《林沖》，他憶述當時突然被指示要「講對白」，劇情講述他要面對飾演40萬禁軍教頭林沖的演員高雄說對白，他笑言自己當刻「震過貓王」：「好彩嗰時啲兵有裙盤，因為我對腳係不受控制咁震，第一次吖嘛，現場過百人，高雄哥同我講：『唔使驚，冷靜啲！』我嗰吓更加驚，但經歷完嗰次之後，我就有個決心，下次我要一take OK！」之後游飈再有機會講對白，他亦如願成功一take過，更獲收音阿頭大讚「咁好戲嘅」。
游飈為做好演員不怕死
游飈自小渴望成為演員，所以他從臨時演員做起，即使當年工作人員要求他從高處躍下，就算驚都照做，希望裝備好自己後去考藝員訓練班成為演員。「嗰時覺得演員高人一等，連梳頭、化妝、服裝（工作人員）都好尊重你，起碼唔會嗌XXX過嚟梳頭，佢哋有獨立嘅車坐，演員好犀利呀！」游飈以此為目標努力向上，由月薪千多元到後來加薪至三千多元，由於當時未有最低工資，因此收入跟不上社會趨勢亦是常事，「咁自己好鍾意做都唔介意辛苦啲，啱我嘅性格，每日都有唔同嘅挑戰，我哋就算落雨等埋位都好開心㗎！」
相關閱讀：TVB綠葉離巢後愈來愈富貴？御用OL變年薪百萬女強人 御用法官轉行做保安
游飈是「TVB御用爛仔」？
游飈工資低仍可儲起半份人工
在當臨記那6年裡，游飈雖然人工低，但開支不多，每月可以儲起半份人工，「嗰陣日日（朝早）6點做到翌日清晨清6點，日以繼夜係咁做，冇機會使錢，衫又着嚟着去都係嗰幾件，最多係食飯或者買包煙仔，都係4蚊，應酬就更加冇啦！」
游飈其後簽約TVB成為演員，但想像往往與現實有落差，笑言曾經遇過「不人道」對待。「我哋唔可以要求人哋對你態度好啲，而家諗返轉頭，如果我當時自己做到某個高位時，人哋點會咁嘅態度對你吖！人哋點敢屈你吖！點解咁樣去玩你吖！」游飈續說：「唔係電視台特別啲，係成個商業社會又好，某間公司都好都係咁，所以由做戲嚟到做生意，發現其實商業社會同電視台，都係唔容易做到成績。」
游飈拒轉行：渴望做好一個角色
游飈透露，當年跟TVB每兩年傾一次合約時，但加薪不多。當年的他人工低，家人多次反對，甚至被要求轉行，但當時游飈堅持繼續做，但他認為自己為的不是發明星夢，「其實係想多啲機會去演戲，做唔做到明星係題外話，我都知自己唔係咩明星嘅材料，雖然我唔係一個合格嘅演員，但係我好渴望去做好一個角色，我都問過自己，想唔想繼續拍戲？我係好想，但好似個環境各方面呢啲外來因素，唔係咁容易，因為成個時代變咗。」
游飈尋找新出路
至九十年代尾，游飈看到一個又一個中年演員突然「消失」，當時的他年僅廿多歲便要黐鬚扮年老「大臣」，當時的他開始意識到演員路有危機，開始要找尋新出路。「我嗰時諗，如果電視台突然唔要我，我食咩呢？驚㗎！所以我去到九幾年尾開始有做配音，去學習，做多啲唔同行業，我哋喺出面尋覓緊其他嘢，你唔學多啲嘢，點會有出路呢？我以前成日講一樣嘢，我哋成日喺電視台，收工就返屋企，我哋接觸返行內嘅人，如果你永遠唔去接觸商界，你永遠會困喺呢個地方，你要踏出一隻腳落商業社會，不求回報去學習，你先可能有啲機會，我慶幸遇到一個機會，有個老闆去創立呢間公司，佢覺得，啊，呢個游飈幾傻喎！雖然咁蠢，又幾肯做。」
游飈成立除甲醛公司 由兩張枱開始
至2004年，游飈與數名拍檔成立除甲醛公司，他憶述當時在商廈以月租1400元租下一間房，內裡有兩張寫字枱，但以他當時的收入，連繳付租金都有困難。「1400蚊一個月其實已經好平，雖然只擺得兩張寫字枱，當你冇錢交時，點樣去解決呢？嗰時我哋唔需要人工，因為我喺TVB仲出緊糧，夠養活自己，只不過要解決公司問題，一步步去發展，呢個故事太沉長。」
游飈指後來開始求變，與其他公司合作推出新的抽油煙機，慢慢做出口碑。「嗰陣唔敢講上咗軌道，但多咗好多公司同我哋合作，都係自己盡能力，我哋希望喺個行內嘅窿窿隙隙生存到，唔好講賺大錢，能夠令到公司生存，已經唔容易。」
游飈：「要別人相信你，要付出好大努力」
游飈認為，做演員和做生意一樣，導演或客戶為何要選擇他？他笑稱自己是全港第一個做除甲醛，至今已經第16年。「好多人以為除甲醛嘅公司就係間間做嘅嘢一樣。我哋公司跟日本標準做法，做得好徹底好仔細，當然價錢係貴，有冇人欣賞，呢個係困難嘅。同電視台有個游颷一樣，我點樣令到人哋去用我，其實我盡咗力之後，有啲嘢我比較難控制，係咪真係你做好一件事，人哋就會用你呢？原來喺商業社會唔係嘅，我都學習緊，而家做生意比起以前電視台個挑戰性更加大，個世界更加闊。但唔好意思，1加1唔係等於2，我要解決好多難題。產品好，得我知，你唔知，我講句好，你唔會信，等於出面街客『你講就係㗎喇！』你點樣令一個拒絕你嘅人去相信你講嘅嘢，需要付出好大嘅努力。」他說。
游飈生意面臨危機 樂觀面對
游飈的生意路，捱過一關又一關。2004年，他由兩張枱做起；2021年，公司生意上軌道，員工共有6人，他當時在土瓜灣工廈租用千呎單位，但疫情過後，如今公司員工只剩4名。他坦言公司現時面臨倒閉危機，「依家公司都係一個危險嘅狀況，我希望能夠轉危為機，可能你下次搵我訪問嘅時候會話，游飈你冚咗旗喎！你嚟緊點生活呀！哈哈……其實呢一關唔容易㗎！希望未來有個轉變，令到公司可以繼續生存！」
對於現時公司是否收支平衡，游飈欲言又止，「我諗呢方面唔好去諗，係絕對唔容易，希望政府對我哋中小企真係有啲支持，令我哋過到呢個難關，我哋唔係想借錢唔還嘅人，只係好想過到呢關！」
游飈是誰？
游飈是前TVB綠葉演員，他1989年投考第三期藝員訓練班，翌年畢業加入TVB，於2012年與TVB結束21年的關係，期間他曾參與拍攝逾一百部劇集，《大時代》一人分飾七、八個角色令人深刻，他自己最有成功感的是《天子屠龍》，飾演傲拜（林嘉華飾演）個大仔納穆福，「雖然我得5、6集嘅戲，後尾畀老豆殺咗啦！都幾滿足㗎！我哋去到七聖廟，場場戲都有我份，因為我要殺人放火，呢啲衰仔富二代。另外《封神榜》做太子殷郊，鄭子誠做我爸爸，所以我見親鄭子誠都嗌爸爸，《搜神傳》做水鬼杜三，添哥（李添勝）畀咗好多機會我，呢個水鬼唔易做，因為我係唔識游水，要潛喺水底講對白，我有去問添哥，『唔怕，有人會救你，唔係好深咋！』」
採訪：林碧洋
攝影：羅安強
