經常爆英偉達（NVDA）獨家料嘅Information，喺周三收市業績前突然爆料，提到英偉達客戶擔心剛剛交付嘅Blackwell晶片（GB200）出現過熱問題，並無詳情交代，至於英偉達方面亦只係官腔回應了事，過熱問題容易解決嗎？唔知，估計基金大戶已就事情向英偉達客戶了解得到，股價冇大跌就可以理解為問題不大。喺周三收市後業績分析員會議上，行政總裁黃仁勳會釋除大眾疑慮。
今次業績，英偉達潛在上升空間相信比下跌空間大，同8月份公布業績前比較，目前大行睇法相對保守，市場預期8至10月收入331億美元，相對公司指引325億美元，只係高出2%，而公司上次業績時提供嘅毛利率指75%，亦係按季下跌。市場績前睇法保守，所以最終數字令市場滿意嘅機會就增加，績後股價下跌嘅機會同潛在空間，都會較細。
英偉達亦將公布今年11月至明年1月收入指引，當中包括小量Blackwell晶片GB200嘅收入貢獻，其餘數據中心GPU收入將以次新產品H200取代舊產品H100，數字亦唔會太差，指引數字可能按季增長30億美元或以上。
與此同時，周五美股大跌，連同周一因為壞消息而逆市下跌，英偉達績前連續兩日弱勢，令市場炒業績嘅期望度稍降溫，並非壞事。
觀乎今次業績期，績前股價調整嘅Palantir（PLTR）及Tesla（TSLA），實際業績好過預期但並非超凡表現，業績後股價都能夠爆升，所以博英偉達業績嘅話，寧願見到目前市場信心有所動搖，就更加好博。
晉佳
https://www.patreon.com/user?u=28525578
相關文章：
