現年61歲、1985年港姐冠軍謝寧在1991年與岑建勳結婚並育有岑寧童及岑寧樂兩女，一家生活看似很愉快，想不到在2005年結束14年婚姻。日前謝寧接受訪問，罕談當年與岑建勳的離婚經過：「喺40歲開始，我就想離開呢個屋企。」
相關閱讀：80年代港姐冠軍重現TVB古裝美人風采 前夫有多段婚姻 女兒曾惹企跳誤會
謝寧罕談與岑建勳離婚經過：
謝寧在2008年創辦她的曲奇王國，成功開拓至內地、台灣及澳門市場，早前無懼逆市投資過百萬在旺角開分店。但原來謝寧最近有新計劃，決定進軍網絡平台，但今次並非與曲奇有關，而是開設一條新頻道，分享女人的故事。日前謝寧接受資深傳媒人汪曼玲的YouTube Channel訪問，她說：「有一日同三個女朋友傾偈，反正我哋年紀大咗，又喺半退休狀態，所以不如試吓呢樣嘢，不過唔係爭飯，只不過係以前有好多女人雜誌，但係而家已經冇晒，所以咪將呢個IDEA擺上網上平台，等大家可以同我哋分享。」
謝寧罕談與岑建勳一段婚姻
謝寧曾經歷過婚姻失敗，當年在TVB發展不俗，不過在1991年放棄事業，與岑建勳並淡出幕前，專心照顧岑寧童及岑寧樂兩女，不過到了2005年離婚。謝寧在2010年與拍拖多年的王德偉結婚，成為幸福人妻。在訪問上，謝寧都有談到當年與岑建勳的一段婚姻，她說：「我都幾十歲，好多後生都有問我以前？離咗婚之後點？點解可以做到宜家咁？呢啲經歷可以好似講故事咁講，但原來呢啲只係冰山一角，大把人係咁。我發覺一樣嘢，有好多女人等啲仔女大先至講離婚，原來唔係年紀大就可以白頭到老，反而係因為仔女都出身，就開始諗自己，想自己開心啲，要離開呢個屋企，唔要呢個男人，獨立過生活。」
謝寧坦承當年是她主動提出離婚
謝寧坦承當年是她主動提出離婚：「其實喺40歲之前，我段婚姻已經唔係咁愉快，當時係為咗小朋友而去忍受，唔好令佢哋冇咗個家庭，所以咪盡量包容、去忍見到啲女咁細個，你又點忍心離開佢哋？點忍心佢哋冇咗父母，就算跟咗我都好，我咪忍咗佢就算，起碼同佢哋嘅關係好CLOSE，可以喺佢哋身上搵返啲安慰，叫做平衡返。但係過咗40歲之後，小朋友開始大，出咗去讀書，我咪開始諗係咪應該為自己着想？我都唔開心咗咁多年，係咪應該令自己開心啲？過番啲自己想過嘅日子？我就開始諗呢件事，想離開呢個屋企。」
岑建勳3個女俱入行？
謝寧為離婚一事感可惜
謝寧表示曾經與岑建勳討論過這問題，她說：「佢當我係講笑，覺得我走唔出佢手指罅，都係扭吓計，因為我從來都冇講過離婚嘅事，突然間講呢樣嘢，佢係愕然，嗰陣啲女出咗去讀書，但都會成日返嚟，佢話好呀，唔緊要，咪諗下，結果一拖就拖咗2年。嗰陣佢成日唔喺香港四圍去公幹，所以屋企好多時只有我，啲女又成日返嚟，嗰陣冇咁大壓力逼住我要即走，大家都係維持喺呢個家。」直到有一日謝寧希望結識男友，所以決定離婚，要完全離開呢個家：「我唔覺得我係一世都唔會再結婚，嗰陣我40歲，係一枝花，過咗幾年唔知會唔會識個新男友，所以不如清清楚楚公開。如果唔公開，人哋有一日見到我拍拖，以為我有婚外情，對我影響咪仲大？況且我都唔係咁嘅人，係因為咁嘅原因，大家有協議咪公開。身邊朋友都好愕然，我哋結咗婚15年，以為我哋好好，冇諗過原來係咁樣，我自己都覺得可惜，15年婚姻就咁冇咗，我都唔知點講。」
離婚後謝寧擔心經濟有問題
離婚後謝寧擔心經濟有問題：「嗰陣叫做淨身出戶，乜嘢都冇拎走，因為係我提出，所以要為自己嘅決定付出代價。我自己係非常擔心，冇嘢做，亦都唔知自己可以做乜。雖然因為仔女同我住，我係有基本嘅生活費，岑建勳係有照顧我哋，唔係冇負責任，只不過我喺心態上唔想拎佢一毫子，我覺得如果要離婚，不如爽快啲走，唔好拖拖拉拉。跟住諗諗下不如教煮餸，試吓呢啲，起碼叫行出咗第一步。岑建勳對我好好，佢冇畀過氣我受，只不過係夫妻緣份冇咗，朋友情同親人關係仲存在，我哋咁多年婚姻，似親人多過夫妻。」
岑建勳曾有過三段婚姻，他在70、80年代曾跟區艷璋、傳媒人劉天蘭有過婚姻關係，並跟劉天蘭育有一女岑寧兒，岑寧兒現時為歌手，曾到台灣發展爆紅。至於與謝寧所生的大女岑寧童為導演及演員，之前在ViuTV劇集《理想國》有份執導，同時在單元《春日裡的溫妮莎》中飾演大學生兼小說作者的文青女神，外貌似足謝寧，而其妹岑寧樂亦從事電影幕後工作。岑寧童在2020年曾於油麻地覺士道1號德成台高處持刀危站，被指懷疑企跳，經消防破門入屋後送到醫院治理，其後岑建勳與謝寧均指女兒只是身體不適，岑寧童接受傳媒訪問時都否認企跳。即使他跟劉天蘭和謝寧離異，與家人依然保持很好關係，至今仍不時聚會。
其他文章：
謝寧曲奇品牌越做越大開夠10間分店 旺區搶鋪生意額回復高峰期7成
