香港破天荒災難大片《焚城》昨日（1日）首日上畫累積票房衝破380萬，成為2024年下半年最高開畫票房港產片，令團隊上下好振奮！謝君豪、王菀之（Ivana）、王丹妮（Louise）、何啟華（Dee）、魏浚笙（Jeffrey）、林家熙（Locker）及許恩怡（Natalie）上畫日更組成謝票先頭部隊，到戲院答謝觀眾支持，同時宣布《焚城》X《破・地獄》限量電影套票，同日開售三小時內經已全數售罄，亦首度公開一眾演員以消防員造型拍攝的「一世隊友2025慈善月曆」，並即將進行慈善義賣，Jeffrey笑言：「我哋咁嘅身型都願意畀機會我哋出寫真月曆，大家真係畀曬面喇！」
謝票小隊現身戲院大受歡迎，被問想交換戲中哪個角色時，阿Dee表示想做豪哥角色「煙鏟」，揚言可以掌摑Jeffrey；豪哥則選莫文蔚，笑指做高官角色有得坐冷氣房演出；至於Louise就選擇演消防隊長的白宇，想嘗試一穿戲中橙色的輻射保護衣「A袍」，眾人又憶起穿上該服裝拍攝的苦況，當時大家都要先背着氧氣樽，再穿上其他裝備，非常炎熱局促，另因為只有20分鐘氧氣提供，故他們經常要換氧氣樽才可繼續拍攝，相當辛苦！
此外，大家又分享參演感受，同聲表示因製作規模龐大，台前幕後各有困難之處，Locker難忘曾遇惡劣天氣：「有日橫風橫雨，啲帳篷都吹跌，大家團結一心咁每人捉住一邊，就連導演明哥同老闆（監製江志強）都一齊幫手！」Ivana非常榮幸能夠參與大製作：「老闆同導演覺得呢套戲係一部講香港嘅電影，所以要求香港實景拍攝，我知道回收場係用上4幅不同空地拼湊而成，當中道具、場景製作都係一絲不苟。」
豪哥再一次感謝出品人兼監製江志強：「令我最感動嘅係而家呢個市道，好似有個傻傻哋嘅投資人，拎咁多錢出嚟投資呢部戲，始終災難片比劇情片投資更多，個風險係好大，好熱愛電影嘅人先會咁做，故此希望大家多啲入場支持！」
