賈思樂首公開鍾保羅死前電話訊息 下月70歲心痛談故友難忘羅慧娟患癌飯局丨獨家

入行半個世紀的賈思樂（Louie）下月「登七」，他坦言人生最痛是見到好友余綺霞、鍾保羅(Paul)、羅慧娟、劉敏儀及關朝聰等逐個離世，尤以阿Paul的死前訊息，35年後講起，Louie仍然講到眼濕濕，直至話題轉到曾捱義氣，主動幫關菊英買M巾慘被大鬧先識笑返。採訪：方騫平 攝影：朱偉彥 場地：City Dancer Grill & Live Music Bar

Louie好掛住5位故友，講到眼濕濕。

Louie好掛住故友。

每次提及故友都感慨萬千。

Louie話𠵱家生活得好好。

下月70歲嘅Louie皮光肉滑。

Louie要Keep住心境開朗。

70年代經典劇集《少年十五二十時》；80年代《歡樂今宵》(EYT)嘅《蝦仔爹哋》帶畀賈思樂輝煌嘅演藝成績。Louie將於下月9日假文化中心舉行《HAPPY TOGETHER 50年 in Concert》，賀入行50周年兼「登七」大壽。他形容今次屬穩陣投資，會主動揼贊助商「科水」，將部份收益捐給好友廖安麗的「身前行動」。

下月9日假文化中心舉行《HAPPY TOGETHER 50年 in Concert》，賀入行50周年兼「登七」大壽。

大班圈中老友現身個唱記招力撐。

當年Louie拍《少年十五二十時》時好靚仔。

2011年賈思樂賣樓自資舞台劇《蝦仔爹哋》，張學友更擔任表演嘉賓。

2019年Louie曾跟6美女開個唱。

2017年曾跟黎瑞恩、王馨平、羅敏莊、李樂詩等開騷。

1999年陳寶珠﹑李麗蕊﹑賈思樂及葉童在瑞士街頭留影。

Louie當年跟Do姐、林嘉華好老友。

當年和黃韻詩及鄭裕玲常聯絡。

Louie與張國榮和露雲娜拍電影《衝撃21》。

賈思樂、張國榮與毛舜筠曾於港台電視劇《獅子山下》合作。

和露雲娜係金童玉女。

Louie同陳玉蓮亦係情人知己。

同已故羅文曾經好老友。

1987年Louie曾奪國際音樂賽事大獎。

1984年金風箏曲創作賽賈思樂及聶安達合攝。

分享唔識老保養心得

下月7字頭的Louie依然皮光肉滑，全靠多年來獲皮膚科醫生Fans贊助療程，另外，心境開朗及思想正面亦是凍齡的不二法門：「坦白講，做人點會冇唔開心？除咗30年前媽媽離世曾試過抑鬱，亦避唔開朋友離世嘅傷痛。」Louie在圈中第一次接觸生離死別，就是患鼻咽癌的「鬼婆」劉敏儀；之後到死於愛滋病的「鬼仔」關朝聰：「我跟狄寶娜摩亞（Deborah）及『鬼仔』成日蒲蘭桂坊，『鬼仔』病發後唔想見人，我最後見佢時已面目全非，留晒鬍鬚，骨瘦如柴完全唔認得佢，真係睇見都心噏，佢臨終前兩年去咗加拿大醫病。」

當年跟狄寶娜摩亞及「鬼仔」關朝聰常蒲蘭桂坊。

關朝聰曾跟黎明及黎美嫻拍劇集《到到唐山》。

跟「鬼婆」劉敏儀係紅顏知己。

「鬼婆」劉敏儀死於鼻咽癌。

娟妹冇「數」過星爺

至於最心痛係余綺霞及羅慧娟遭逢不幸：「當年我同陳玉蓮及余綺霞係『沙田第一城鐵3角』，霞女亦係我家中常客，留宿打地鋪傾心事。」1988年霞女經歷《歡樂今宵》澳洲嚴重車禍，影響到面容令佢好唔開心，但仍咬緊牙關打仗，點知兩年後再不幸患上鼻咽癌：「確診時佢晴天霹靂，同我呻話『我咁好人，冇做過壞事，唔知點解個天咁對我？』嗰刻我無言，只能答佢『可能個天鍾意你，點都想見到你，但唔緊要，我哋遲啲會見，你上去玩住先…』我陪佢過36歲生日，3日後佢就離開咗。」至於「女版Louie」羅慧娟跟他性格一模一樣，兩人無所不談，但娟妹從冇「數」過前度周星馳。Louie說：「當年佢介紹老公我識，我係佢哋嘅證婚人。」

當年霞女係Louie家中常客。

10977年港姐冠軍朱玲玲(中)、亞軍呂瑞容(左)、季軍余綺霞(右)都係靚女。

1984年賈思樂邀請9個美女為TVB拍特輯，中包括廖安麗與余綺霞(左排第四位)。

Louie永遠記得嗰餐嚇死人嘅飯局：「娟妹食食吓飯，語帶輕鬆咁話『我有胰臟癌！』當時同枱個個嚇到呆咗，我即放低筷子，忍唔住流淚，佢反而安慰我哋『喊乜呀？夾餸食啦！當時我又點食得落啫？』」後期Louie去醫院探娟妹，見到佢插滿喉講唔到嘢，好心痛。就算娟妹走咗12年，佢老公劉志敏依然會約Louie食飯。Louie好感慨，「劉志敏人生受好多打擊，因為佢第一任妻子亦是死於cancer！」 

羅慧娟有「女版Louie」稱號。

賈思樂、羅慧娟都係樂天派。

2008年下嫁金融界富豪劉志敏的羅慧娟曾幸福過。

羅慧娟人品好好，冇「數」過前度星爺。

羅慧娟係抗癌戰士，笑住打仗。

過年幫菊姐買M巾捱鬧

另外，Louie因為《歡樂今宵》而認識鍾保羅，當時他跟余綺霞是一對，故3人經常聚頭：「當日我離開TVB去大馬發展，佢有提出租我間屋，但最後我婉拒咗，不過，我走前，佢曾揸車嚟我屋企樓下送我指南針禮物，仲同我講『希望佢能帶你行啱嘅路！』當時我感動到係咁流眼淚，直至有一日聽返電話留言，阿Paul用沉重聲音留口訊，話『明天BBQ唔嚟喇，你哋(EYT同事)玩得開心啲，再見！』最後嗰句真係聽到毛管戙，原來係死前告白。」Louie指阿Paul係最佳司儀，沉迷賭博最後走上不歸好可惜：「佢冇欠過我錢，問我借100蚊都有借有還，最奇妙係每張20蚊都摺成細細張，似係賭本。」Louie仍然好掛住一班故友：「我想同佢哋講『雖然冇佢哋喺我身邊，但我ok嘅，可以好開心咁活落去。』」Louie重提爆笑往事，稱當年喺台南拍《EYT》，主動捱義氣幫菊姐買M巾，竟被同事大鬧：「冇諗過工作人員話新年流流大吉利是，其實我冇乜所謂，最後自己一個人去買，用身體語言搞掂，當然菊姐有畀返錢我，自此我冇再幫人買過M巾喇。」

鍾保羅輕生前曾送指南針給Louie作禮物。

Louie和關菊英曾合作拍TVB廠過年特輯。

Louie曾幫關菊英買M巾。