早前棄用英文名的歐陽震華，最近宣布加盟英皇娛樂，63歲的他決心轉向電影圈發展，恨演反派以及跟好戲之人惠英紅合作。他又直言「未搵夠」冇退休打算，更回應到內地登台竟被指「淒涼」，「要拎住咁鬼重嘅咪唔淒涼？！」其實華哥早在90年代已有到影圈發展機會，除時機不適合外，最重要他狂收超過50個邀拍電影電話,都聲稱冇Budget，令他一度忍不住發晦氣鬧走對方，因而被唱：「話我嫌錢腥！」採訪：杜杜 攝影：譚志光 化妝:Gary Chung
華哥因疫情期間經常在串流平台睇戲 ，令他很想拍電影，但有感在TVB難有機會，於是2020年約滿TVB決定不續約。他認為英皇是最合適合作單位，就透過太太傅潔嫻搭路，「歐陽太有啲太太團朋友，同霍小姐（霍汶希）即係Mani都識，就試吓水溫，睇吓有咩反應。」點知一講Mani即做嘢，「隔咗1、2日就電話到，我話唔使咁急，我話過埋個（農曆）年先。」他形容過程好順利，「好爽快，冇拉鋸情形出現。」
恨演反派同惠英紅合作
華哥謂加入英皇娛樂令他好放心，講到對未來期望，他表示徇眾要求下最想演反派角色，「好多人話想睇我做反派，以前我唔係唔想做，只不過係唔畀我做，因為幾十集劇，個男主角係壞人，得就得，唔得嗰幾十集啲收視邊個處理？！」他認為既然在電視圈「好人難做」，電影圈是唯一出路，「電影嘅反派都可以係主角，唔係一出嚟殺人放火嗰啲反派，好叻嗰啲反派都得。」簽新公司後，華哥最想跟同門的惠英紅合作，「我講咗出嚟好貪心，唔係因為佢係女主角，我想做男主角唔係咁高攀，只係想有套電影可以合作，同佢喺裹面有交流。」其實他跟紅姐認識多年，但一直沒合作機會，「我識佢嗰時，佢未入TVB仲拍緊電影好紅，我嗰時仲係游走緊2、3線，到我喺TVB上咗1線，紅姐就入咗嚟，佢都沉澱咗1、2年，拍《法證先鋒II》佢做阿佘（詩曼）阿媽，對手戲或者砌磋機會咪細咗囉！」
去年11月，華哥到南京商演被指半退休，更有網民見到他這情景用「淒涼」來形容。對於被指半退休，63歲的他沒好氣道：「我根本未退過休，亦冇諗過退休，只不過做與唔做啫！」他沒想過退休，直言因未搵夠，「梗係未夠啦！」講到外界一直認為他太太傅潔嫻是澳門前賭王傅老榕的孫女身家豐厚，他應該不憂做，他就笑言：「應該咁講，歐陽太有唔等如我冇，我咁多年不斷努力工作，唔係食濕米嚟，同埋所有屋企嘅嘢都係佢話事，不過我決定，哈哈！」問到被形容「淒涼」是否可笑？他答得好妙，「淒涼到呀吖！又要坐飛機，又要企喺度做嘢，又要拎住咁鬼重嘅咪唔淒涼？！真陰功！」
精明拍3級片冇露過點
華哥其實早在90年代初已有不少拍電影機會，但以3級片居多，「嗰時好興，男仔就搵TVB，女仔就搵ATV出去拍，我身邊好多人都拍過。」但他接拍時通常都不知是3級，好似1995年的《迷奸犯》，「我都中過招，初初改個名叫《明日天涯》，嘩！仲唔係攞獎！但後尾先知講迷魂黨落藥檸檬茶，跟住變咗迷姦犯，其實迷魂唔同迷姦喎！但係姦嗰方面就唔係我做，係我啲手下做，但我變咗唔係主謀都係幫兇啦！」雖然拍過3級片，但他好小心並未有裸露演出，「我以前好精，合約寫明最大暴露都要有條孖煙囪。」
華哥1982年入行，直到1992年憑《壹號皇庭》演檢控官「余在春」才開始冒起，他坦承錯過跳出影圈的好時機，「我喺電視台10幾年先企穩，畀人感覺係不折不扣嘅電視人。」加上搵他演出的電影都不是主角，甚至是客串，「我假假哋喺電視台都係現役男一，就算唔係主角都要有個人物，搵我做啲群戲，我點返去同珍姐（曾勵珍）交代，捧到你咁樣，呢啲唔使人講自己都諗到。」當時亦因一通電話，令他絕跡影圈，「個個搵我拍嘢唔係話客串，係有角色，但每個人打嚟講唔夠3句啫，就話冇budget嘞！我聽過超過50個呢啲電話，有次我就滾，我話『點解你哋個個都係咁嘅，冇budget就搵我，有budget咪搵劉德華，我都未開價錢』，跟住佢話唔好意思就收咗線，咁以後唔使煩，冇人搵我啦，哈哈！一傳十十傳百，有人唱我話我嫌錢腥，好好笑㗎！」
