香港警匪片從來領導亞洲潮流，故此，能在香港上映的亞洲警匪片，頗有「踢館」味道，但真正成功的不多，最著名能站穩腳只有「怪物刑警」馬東石《犯罪都市》系列，部部收得。點解？令人心花怒放！
等呀等，馬來西亞終於爆出一套狂收的警匪片，名《警長．捉內鬼》。既然咁巴閉，當然飛身先睹為快。
不過，弊！如此雷霆萬鈞殺到港，院商點解唔睇好，搞到甚少戲院上？有的也只是天地場，甚至一天只有一場，認真 料！
此片非常出色，掌舵的導演撒齊尤索夫，只有三十二歲，十六歲出道拍短片，百分百天才神童，來自電影世家，父親也是導演。
至於幕前靈魂人物，飾演警長的，乃三十七歲混血兒演員及模特兒祖爾阿里芬。
此片負責Casting及造型的幕後，應記一功。因阿里芬眼神充滿正氣，演反貪先鋒不作他人想。不過，實在太靚仔，欠缺多少猛男氣概。於是造型大師出手，替阿里芬設計出濃密型爆的鬍子，就此，一露臉已足以壓場。
導演在營造氣氛方面，也技法到家，尤其片頭將大毒梟塑造到不可一世，先由法官判無罪，再由大群律師及手下擁簇步出法庭，令觀眾咬牙切齒，覺得正義無法伸張。
然後，鋪陳出現專殺毒犯及貪污警員的「冰毒殺手」，頗有替天行道的味道。
《警長》一片高潮起伏，氣氛緊湊，可說絕冇冷場，整個製作已到荷里活A級尾卡士，以馬來西亞水準來說，可算超班。
不過，此片有一大缺點，為劇本亂扭橋，真係扭到鐵都攣。因劇中人物除「警長」外，個個都隨時可忠可奸可變臥底 有點大話西遊味道。總結，入場啦，真好看。
