闖蕩飲食江湖幾十年,再加經營過餐館,小弟對這個行業的優點與缺點,可算略略掌握。
飲食業一如所有行業,龍蛇混雜,有極高層次情操者,也有極之卑劣蠱惑者。
例如早年的鯉魚門,「威名遠播」——見人就斬!當時豪客不絕,先而日本,後而內地,大腕大款不問價者多如星星(大都是花公數或不能見光的黑金),有人認為唔斬佢 就天無眼。
結果,斬 斬 ,斬慣手勢,連本地客亦手起刀落,個個一頸血離開。
就此,鯉魚門的「形象」,深入民心。經濟大旺時,仍勉強頂得住,不過,一到2019年打落,社會運動加疫情,立即謝晒,有一段時期,入夜後,非常驚人,靜到烏蠅飛過都聽到。
食物貴,只是其一,另外,交通不便也是頭痛。大熱天時,由港鐵站行落要十五分鐘,去到酒家已全身濕透,食興減半。
坐的士?勁貴。 車又如何?又是有段時期,所有停車場飛擒大咬,小弟試過一圍人 四架車入去,食足幾小時(吃得開懷也),結果,泊車費大出血,六百幾元,畀得起都MM聲啦。
今日講起鯉魚門,因有相熟經理晶姐被挖入去幫手,友情關係,勉強都要應酬一次。
咦,印象有 改變喎。可能早「被洗盡鉛華」,方方面面都唔敢再斬客,包括停車場及食肆,結果期望越低,驚喜越大,嘗到久未試過的高質素龍蝦刺身及野生海魚。
不禁歎句:「冇法,全香港最正斗的海鮮,仍多聚在鯉魚門。」
試完一次,有信心 ,一於下月初拉大隊為食尖咀友再殺去搵晶姐,若掂,就在此公布食過乜,水準如何,應該可以幫到少少手,令鯉魚門翻身。
到底,此乃一個香港地標,救到就救啦。