馬季進入高潮，馬迷樂不可支，因大賽接踵而來，明星騎師、明星馬紛紛空降，勁！
睇返本土騎練，跑到今天，邊個最巴閉？唉 最無奈，仍然是忽龍忽蟲的「軟硬鞭」潘頓隻手遮天。本來布文有機會接近的，但先而停賽，後而墮馬，好難追 。
當然更甚是潘頓騎功的確高，除方嘉柏外，不少馬房的鎮倉寶皆落入佢手，任揀，好馬歸晒邊，今年呢條「軟硬鞭」又冠軍梗了。
練馬師又如何？如今伍鵬志大幅放領，睇勢好似好鬼勁。不過，馬季跑「大長途」，放領若果冇足夠氣量，好易入直路已腳軟，任過！
資深馬迷多喜歡研究每個馬房的子彈，小弟當然也如此，一睇，有兩個馬房彈離，一為蔡約翰，另一為沈集成。
舊馬大部分實力見得七七八八，但新馬因未上陣，則可深不可測。蔡廄及沈廄正正是最多新馬，將會稍後一一陸續登場。
每季皆如是，蔡神仙永遠你急佢唔急，季初放軟手腳，反正冇乜大賽。不過，踏入11月，就開始玩「連珠炮發」，一個賽日直落掃幾場閒事，好似食生菜。
今季蔡約翰最大對手，一定是沈集成，未用的五十二分起步新馬，接近二十匹，當逐一亮相時，大家就會知佢手寶藏勁成點！
今晚跑快活谷，最好睇又最刺激，應是二班千二米。蔡廄出兩隻，能否任佢開？未必。雖然「嫡愛心」及「魅力寶駒」皆此程有根據，兼且排好檔，尤其後者，今季四次上陣，兩輸短頭，進步中，突然配嘉里，冷味甚濃，可能是主角！
不過，今場對手有「傑出漢子」、「電氣騎士」、「四季醒」及「小霸王」，全老虎級，隻隻都有力贏，點揀？我決定六隻中飛起最熱的一隻，再五穿十Q及PQ！
