近期憑電影《毒舌大狀》飾演保安「陳球」而人氣急升的資深甘草演員麥子雲，早於70、80年代已是TVB的「御用奸人」，由於個樣生得惡惡哋，所以劇中演繹惡霸、跟班、扒手及悍匪等角色居多。雖然當年因外形侷限戲路，但現實中他卻因此覓得「初戀嬌妻」，明天就是一年一度的情人節，麥子雲罕談與太太的愛情故事，分享兩人的半世紀愛情長跑。
麥子雲與太太轉眼已愛情長跑52年，婚後育有四名女兒，68歲麥子雲亦搖身一變成為「寵妻狂」兼「女兒奴」。日前他接受《星島頭條網》專訪時，滿面幸福笑談夫妻Sweet爆點滴，他說：「愛一個人要識氹佢，如果愛幾個人，你邊得閒氹咁多個呀！」惡形惡相的麥子雲就見得多，私下一副「痴心情長劍」冧樣你又見過未？一起來看看麥子雲如何保鮮愛情吧！
【點擊睇麥子雲訪問及珍貴舊照】：
麥子雲與太太的愛情故事一切從中學時期說起……
話說16歲那年，麥子雲遇上當時14歲的同班同學麥太，自幼是「怕醜仔」的他連撩女仔及抄牌都冇勇氣，好在天生濃眉大眼帶點殺氣先抱得美人歸，「當初好多飛仔撩佢，我就負責幫佢擋，嗰時我個樣惡嘛，加上鍾意周身郁，我未學功夫已經識打交，擋擋吓大家一步步鍾意咗都唔知，好自然就喺埋一齊。」結果這段初戀一拍便52年，二人婚後誕下四個寶貝女，麥子雲一臉冧滋滋續指，最欣賞太太多年的拚勁，「佢讀書叻過我，事業心都好強，仲工作狂過我，而家地產經紀做到經理級，唔怕辛苦唔怕忙，同我一樣好捱得，所以反而係佢覺得我黐身，因為我任何嘢都鍾意共同去做，即係佢煮飯我洗碗、佢洗衫我晾衫，唔會好似大爺咁坐喺度。」
樂做女兒奴 照顧五條Queen
想不到擅演惡人的麥子雲，私下卻是一個不折不扣的「住家暖男」！由結婚至今，他即使工作再忙也會分擔家務，甚至跟太太爭住照顧小朋友，無非只想減輕另一半的壓力。記得初為人父為努力賺奶粉錢，麥子雲最高峰試過同時打三、四份工，既要拍劇又要賣保險、打理飲食及印刷生意等，雖然攰到成身散晒，但回到家中他仍堅持幫忙餵奶、換尿片、氹囡囡瞓，麥子雲憶述：「生大女Anna嗰時我最忙，覺都冇得瞓，記得嗰時我搵條繩綁住隻腳，我係用腳趾一邊搖住張BB牀咁瞓。」
到女兒步入讀書階段，不論報校、教功課、管接送，「廿四孝爸爸」麥子雲仍然親力親為，「家長日或任何表演我都必定去，試過趕接佢哋放學嗰陣架車爆軚，我逼自己五分鐘內換好條軚。」笑問看到「惡人」從電視機跳出來，可有嚇窒一班小朋友？全程傍實父親的Anna即笑道：「嗰時啲同學仔本來傾緊偈好嘈，爸爸一經過，大家就即刻靜晒，然後細細聲話好惡嗰個嚟咗，哈哈，不過同班同學知佢係我爸爸就唔驚，因為佢從來唔鬧人。」麥子雲聞言則Sweet爆稱：「又唔係從來冇鬧，但好少囉，打就更加唔捨得啦，試過打完好後悔。」
三招寵妻 最緊要互相包容
雖然錫到四位「前世情人」燶，但「今世情人」亦從不被冷落，看似「木獨」不懂浪漫的麥子雲一講起冧妻招數即眉飛色舞，他忽然側側身掩住半邊嘴笑說：「氹佢就經常㗎啦！任何結婚紀念日、情人節等，我都畫畫送畀佢。我哋一向比較低調，做任何嘢唔會好誇張，最驚喜都係為佢搞生日派對，但兩公婆好清楚對方嘅性格同節奏，有時畀驚喜佢都唔易㗎。」問到維持美滿婚姻的夫婦相處之道？麥子雲就分享了三大「寵妻」秘技：（一）謹記重要日子，製造浪漫、（二）懂得換位思考，互相包容、（三）適時關心，了解伴侶心情差因由，他說：「每個人都會遇到唔開心或心情唔好，咁你就要體諒對方、關心吓對方點解唔開心。同埋最緊要互相包容，佢發脾，你就唔好出聲，所謂包容就係大家都唔好死撐，如果兩個都發脾氣就爆燈啦，總之一個鬧一個忍。」
採訪：黎寶倫
攝影：朱偉彥
場地：凱旋門私房菜
