柯雨霏在TVB《聲秀》決賽中奪得亞軍，冠軍馮熙夑（Ryan）獨得10萬元獎金。柯雨霏對賽果沒失望，「行到呢度好感恩」，又指前日突然聲沙，幸導師泳兒知道後即時安排醫生來幫她針灸。泳兒表示綵排時，見柯雨霏高音出問題，加上她大壓力會爆喊又失眠，故急call相熟中醫師幫忙。問到要如何報答泳兒老師？柯雨霏即問對方「你想食咩？」不過泳兒就指會睇實愛徒荷包。
柯雨霏︰有造馬我使咁緊張？
對於宣布冠軍一刻現場有噓聲，亦有很多網民替她得不到冠軍感不值，柯雨霏愕然說：「我好驚訝！我多謝大家鍾意我，受寵若驚，Ryan（馮熙夑）一直以來都唱得好好，係好強勁嘅對手，佢攞到我都為佢開心，我行到嚟呢一步經已好感恩。唯一小小遺憾我真係比較窮，我真係有啲想要錢（奬金），呢個真係好可惜，攞咩獎都冇所謂，畀$5,000都得，我真係冇錢！」對於有網民質疑冠軍是內定，故才在台上講「分錢」一事，柯雨霏解釋跟所有參賽者也有談這話題，表示︰「講笑咁講，Ryan都有同我講，如果我攞咗要分$35,000畀佢，純粹講笑，冇內幕，如果有內幕我就唔會咁緊張！（分畀你真係袋？）應該唔係，我會逼佢請食飯！」
柯雨霏形容自己的表現，「已經盡晒全力！我已經係逼自己唔使去諗咁多嘢，但前幾日真係……我已經好耐冇瞓過一個好覺！」泳兒指事前跟柯雨霏說這是當歌手必須要經歷的壓力，指自己剛入行時，也試過演出前失眠，也不能好好睡覺，故著中醫師給她安神藥，「我都成日心靈輔導佢。」
相關文章︰聲秀決賽 | 馮熙燮唱《七百年後》頻甩漏失誤仍做低柯雨霏 蘇永康建議演繹《小心地滑》成奪冠關鍵
泳兒笑柯雨霏「未知數」
對於柯雨霏只能獲得亞軍，泳兒指不會覺得可惜，愛徒已是超額完成，笑指她前日唱《荊棘海》時是另一個人：「佢喺個海度唔知浮咗去邊，呢晚決賽我佢返番嚟，我要冠一個名稱畀佢叫『未知數』，我永遠預計唔到佢上台可以點！有網民支持我都覺得開心，有網民留意佢，已經贏咗啦！之後條路最緊要，名次係呢一晚，之後大家都係從頭開始。」而柯雨霏指最想做的就是食、瞓，泳兒笑指比賽期間禁止她食炸物和雪糕，現在可以盡情食。雙料季軍胡子貝就形容是意外收穫，沒想到會得到兩個獎，同時有點不甘心，唱畢《無盡》沒有遺憾，望唱第二首歌給觀眾聽，他亦打算留港發展。
