長居泰國的胡慧冲（Roger）近日返港，除了帶「冬蔭表姐」阿Yen拜會泰國金龍王外，更與「豬農堂弟」胡家健錄製新歌。他忽發奇想提議組成「男豚」組合，融合自己與胡家兄弟的幽默風格。同時，在剛完成的《冲遊泰國11》中，Roger「勒令」拍檔黃婧靈（波波）收起性感，避免着穿窿泳衣。 採訪：方騫平
金龍王預言Roger會做出成績，各方面會越來越好。Roger第一步實踐「二胡組合」夢，自資出歌，將《冲遊泰國》歌曲《夜思》重新填詞，一曲兩個版本，除了有二人合唱版本《冲家聲》外，另又亦為胡家健度身訂造獨唱版《中年的聲音》，不論歌名及歌詞相當配合他的經歷：「尤其歌詞『香冮美景 山高水清 好聲音唱一聲』更加貼切。」Roger坦言：「我送呢首歌畀佢，以後登台可以一曲走天涯，而且佢係唱家班，希望可以唱紅呢首歌，因為我真係好鍾意呢個旋律同歌詞。」
驚畀肥媽瘀唔敢參賽
Roger對音樂創作充滿熱情，指泰國做歌每首只需10000元港幣，成本不高，反而可以滿足自己嘅創作靈感。他表示，組「二胡合唱團」純粹just for fun，如果反應好就會繼續落去。不過，他又忽發奇想：「我本身有肉地，加埋作為豬農嘅胡家健，同埋佢肥嘟嘟嘅親弟胡家樂，呢個『男豚』組合好有娛樂氣氛，成件事好似草蜢咁，變得好好玩！雖然我哋三個唔係靚仔，又係中年人，但𠵱家開心及正能量好緊要，能帶出歡樂都係好事。」Roger謙虛話不敢參加《中年好聲音》，因參賽者水準越來越勁，猛將如雲：「我驚肥媽叫我『返去唱泰文歌』，咁就瘀到不得了。」
另一邊廂，Roger同黃婧靈（波波）以「冬波肉」組合剛拍完《冲遊11》，上輯波波以「胸降」節目成為焦點，但今次Roger就自爆「勒令」她收斂。Roger笑住解釋：「今次我叫佢盡量買啲質料靚啲嘅泳衣，唔好着兩着就穿窿，更叮囑天氣轉涼，驚佢冷親，最好泳衣外加tee！」但強調並非因為上輯波波太搶鏡而刻意打壓，始終節目提供旅遊資訊，泳衣環節點到即止就算，若隱若現先至好睇。
