《陳慧琳Season 2萬人結界演唱會》昨晚（26日）來到第9場，驚喜邀請到電影好拍檔鄭伊健做嘉賓。Kelly介紹伊健上台時透露，對方原定7月20日擔任嘉賓後離港，卻因颱風延期，成功改機票留低。
鄭伊健憶拍戲零度跳海
他們合唱《甘心替代你》後，伊健分享一段鮮為人知的拍戲往事：「拍《東京攻略》（2000年上映）ending時，我要喺零度跳海拍爆炸戲，凍到郁唔到，要等船接，點知突然見到Kelly伸出『神聖之手』！雖然拉唔到我上船，但佢特登走出嚟，呢份心意我一直記得。」感覺溫暖。Kelly聽完大笑：「真係全靠隻手！」伊健繼續爆料：「當時拍動作戲搞到肌肉撕裂， Kelly竟然送盒粉紅色平安膏畀我！好感動，但真係唔多襯佢形象。」Kelly立即反擊：「以前出埠最鍾意帶嘛！我同你合作多數喺海外，《東京攻略》喺東京、《幻影特工》喺馬來西亞、《盜馬記》喺布拉格，仲有30年前澳洲演唱會，所以今日專登著西芹裙歡迎！」伊健卻笑佢似「Big Bird」，又爆《甘心替代你》係自己首次同人合唱，嚇到Kelly瞪大眼：「真㗎？」而在Kelly換衫時，伊健就演唱《發現》，現場反應熱烈。
雷頌德︰冇陳慧琳就冇我
此外，音樂總監雷頌德（Mark）特別從英國返港助陣，台上真情告白，感謝Kelly與她經理人鍾珍：「你成日多謝我，搞到好似冇雷頌德就冇陳慧琳，其實冇陳慧琳就一定冇雷頌德。真係㗎！大家話，唔係陳慧琳邊有人有氣質唱《風花雪》，唔係陳慧琳邊有人夠清純唱《誰願放手》，唔係陳慧琳邊有人咁型唱《花花宇宙》，所以好多謝你請我嚟享受我哋呢30年嘅成果！」最後聯同單立文、Joey Tang送上《一切很美只因有你》，搞到眼淺嘅Kelly再次眼濕濕。完場時觀眾不肯離開，Kelly被觀眾熱情感動encore：「把聲開始沙，聽日仲有尾場，真係得返半條人命！送首少唱嘅《You’re the one》畀大家。」
