乜嘢人會成日想投資？貪心、無知、無聊與寂寞。
騙子全是「心理學家」，故精於針對上述四類人落手。本來，小學都有得教，邊有咁大隻蛤乸隨街跳、世界並冇不勞而獲！兩句已包含無盡真理。
金融世界，當然騙子如麻，合法及非法的多如沙數，單靠執法者，絕對杜絕不了，因很多時並不涉及刑事，而是「水魚」自願。
倫敦金經紀不停買賣呃佣
行騙手法其實也五十年不變，讓我講講個人經驗。上世紀七十年代，同樣是騙子如麻，其中一種手法，至今騙子仍沿用的，正是——倫敦金，我全盆掌握，因做過倫敦金經紀，親入虎穴見證怎樣呃客而無懼受刑責。
首先，倫敦金是中性商品，並不犯法，但因金價不停波動，故經紀一定遊說客人簽下授權書，以便代其24小時監察市場、捕捉最理想出入市時機。這是行騙第一步，當客人簽下授權書，已似水魚入籠，經紀可以「合法」地透過不停買買賣賣呃佣。
攻於心計者營造大賺假象
但這並不是大茶飯，攻於心計的奸經紀，會自己也開一個戶口，在同一價位替客買時，佢就同時賣，而替客賣，佢就買，如此，必有一方賺。經紀會買通盤房負責人，初時賺的就篤落客人戶口，蝕的自己吞，做成一個假象客人不停賺錢。
這段時期，通常次次賺幾千，經紀不停恭喜客戶：「嘩，犀利，又賺幾千喇，幾易呢！」客戶根本不知次次賺的真象，只歡天喜地……嘩，咁易賺，當然加碼，由幾千玩到過萬，繼續「中」。此時開始慢慢失去理性及自制能力，信晒「英明神武」的經紀。
存入巨款後 終一鋪清袋
最後經紀起錨：「X先生，你又叻又好運，賺一萬幾千太少喇，不如放幾百萬入戶口，玩大啲，賺多啲！」十個九個信，以為自己真的又叻又好運。於是就在放入三、五百萬，之後……某日就會收到電話：「弊，市唔就，一鋪清袋。」
其實冇清袋，只是經紀將水魚的錢過戶晒落自己及盤房負責人個袋。
今日重溫，因有一位退休寂寞老同學中招，經紀為靚女，老同學先死寂寞、後死貪心，失去基本理性也。
資深傳媒人 曾智華
