唔單止美股，即使係港股，都成為地板高、同時天花板亦高嘅市場，買盤源源不絕，亦唔知乜人咁有信心，好似而家唔買、慌死之後買唔到咁款，或許一年半載之後，股市會升到遠高於目前水平，然後真相大白。兩個市場當中，抗跌能力較強嘅高息股持續向上，呢啲低估值股份能夠拉高地板，同時代表天花板嘅當炒概念股亦升至高水平。噚晚美股有核能股、量子科技股大升，港股近期亦有生科股升極都有，稍後一段日子，概念股只會輪流炒起，千祈咪低估概念股嘅天花板，尤其擁有AI概念。
投資者對概念股非常寛容
噚晚美股市場急升嘅OKLO（OKLO）、NuScale Power（SMR），以至一眾量子科技股，呢類股份嘅收入、盈利貢獻未有耐出現，都能夠炒到飛起，反映投資者對概念股非常寛容。寛容嘅程度連剛剛被沽空機構打擊嘅Tempus AI（TEM）都頂得住，即使沽空報告理由充分，股價跌兩日就回升，目前已升越沽空報告前高位，唔怕你劣質，但求你有概念。
目前，美股重新進入慢升階段，每晚由少數熱門股炒熱氣氛，其餘大部分股份只微微向上。呢種細水長流嘅走勢，拉長美股上升時間，觀乎美股展開中線跌浪過後，一般喺4個月內都唔會有另一輪中線跌勢，按往績睇，美股喺8月之前出現顯著下跌嘅機會不高，只在乎後市炒乜。
多鄰國正值調整屬低吸機會
多鄰國（DUOL）作為AI教育股，4月份反彈市之中，係最快破頂嘅美股之一。不過，過往一個月，股價先橫行後調整，跑輸大市，由領頭強勢後一下子變成落後股，正值調整反而係分段吸納好機會，皆因美國4月下旬公布AI教育扶持政策嘅初步內容，並且表明90日內會落實詳細內容，於是喺7月下旬或之前，有望見到利好政策出台，有機會仿效近期核能股上升模式，現階段不妨趁弱勢吸納。
晉佳
