葉子楣（Amy）日前舉行「華麗相聚之夜」生日派對，宴請一眾好友包括胡楓（修哥）、陳欣健、黃玉郎伉儷、樂易玲、馬來西亞酒店拍檔Evians、Daisy Yeung、麥當傑、舒雅頌、譚倩紅、文雋、夏文汐、周美鳳、鄧英敏、黃錦燊、連炎輝、佘媽、古媽、冬嬸、詹瑞文、文雪兒等到場賀壽。
葉子楣遇重重挑戰 更珍惜人生
宴會開始前，屏幕先播放Amy由孩童時代至今的照片視頻，及後陳欣健上台介紹Amy出場，並搞笑以「大」字形容Amy，解釋其實是為人大方、大情大聖，生活與職業都大起大落，並提到Amy當年雖然成功，但突然為一個深愛的男人而大膽放棄一切，洗盡鉛華，放棄咗佢嘅名、利和社交活動，隨後經歷上天的折磨，奪去她心愛的男人，但這些挫折仍未將她打低，令她更加珍惜人生。
台上多謝親家姐
一身性感打扮的Amy現身台上，她表示：「有人問我今年點解搞個咁大型嘅生日會？其實真係冇咩特別原因，只係希望大家開心，一班好好嘅朋友係度食飯同相聚，我就已經好滿足同好感恩，多謝你哋嘅光臨……今晚實在太多嘉賓，我唔逐個去介紹，不過首先要多謝修哥，因為佢94歲都嚟參加我嘅Party，佢係我最尊敬嘅前輩！第二個要多謝嘅係Alan連炎輝先生，佢做好多善事，同埋佢成日包場請大家睇戲，支持香港電影，我知道明年2026年係馬年，電影就會興旺，所以大家唔使擔心；都要多謝我馬來西亞拍檔Evians，我本身係拍戲嘅，但突然間識咗佢，令我有機會走去商界，投資酒店，我會多多向佢學習；都要多謝親姐姐，得佢一個人夠膽鬧我，因為係兩年幾前，我出返嚟俾記者影到相，佢竟然話我做乜出嚟，你睇下你，最憎你出嚟，你收埋自己咪好囉，出番嚟就俾人指指點點，我同佢講做我哋呢行已經習慣比人影，因為我覺得唔會全部人都鍾意你，亦有人會唔鍾意你，我已經習慣，我記得周星馳都比網民批評過，不過佢答咗呢6個字『佢未了解我啫』，其實啲人唔了解我唔知我性格，但我亦都唔會同佢哋解釋，我覺得我就係我，做番我自己係最開心。」
Amy 用3個月籌備生日會
現場掌聲雷動並大叫Amy，她續說：「我自己一直心存5個心，對人要真心、對自己有信心、做事要有決心、最重要係懂得將心比心，我相信對人好一定會有回報，就好似今晚見到咁多嘉賓着到咁靚嚟到參加我嘅生日會，我真係好感動，所以我覺得今晚點都係我最好嘅回報同最大嘅感恩，多謝你哋。」接着Amy便為大家送上一曲陳慧嫻的《人生何處不相逢》。晚宴期間，修哥、陳欣健、黃玉郎伉儷、舒雅頌、夏文汐、楊仲恩、李思捷、蘇姍及龔柯允等都有上台為壽星女獻歌，Amy也隆重其事換了另一套衣服出來再度高歌一曲草蜢的《失戀》，及後她表示這個生日會令她最難忘的是來自所有朋友的祝福，「生日願望係心想事成，要乜有乜，今年已經很好，但希望明年更加好，大家愈嚟愈好，我就會好開心。」Amy 透露用了3個月時間籌備今次生日會，因為要一早預約朋友，而她全晚最開心的一件事，便是馬來西亞拍檔Evians特別把早前由馬來西亞拿督基金會頒發的《80年代最具影響力女演員》奬項人肉速遞到香港給她。
