梁詠琪（Gigi）「時間遇上我們」世界巡迴演唱會，日前飛到多倫多及拉斯維加斯舉行，原來對上一次到多倫多開show，已經是22年前的事：「好多年冇嚟呢兩個地方做show，感覺到呢度嘅歌迷好興奮。其實我都好興奮，多倫多22年冇嚟，見到大家咁熱情，真係好開心，好多朋友話俾我聽，佢哋以前聽我嘅歌，後來移民嚟美加，今次專登嚟睇我個show，而且可以落台同佢哋握手拉近距離，好難得！」
向歌迷派福利
Gigi走落台時歌迷一湧而上，場面一度失控，雖然有兩位外籍保安「護駕」，但專心同歌迷握手的Gigi，竟然越行越遠，差點找不到路走回舞台，非常搞笑。「一向好enjoy演唱會嘅握手環節，見佢哋一路忙住攞手機拍片，一路同我握手，少啲技術都唔掂，所以我通常慢慢行，其實自己都好enjoy！巡迴咗咁多站，難得今次美加站場地許可，梗係要製造特別福利俾歌迷啦。」
填詞人陳少琪囡囡亦有捧場
Gigi不單止握手，還邀請歌迷跟她一起上台合唱，「我覺得佢哋真係好叻，臨時被我拉上台合唱都無怯場，仲要唱得唔錯！其中一個歌迷當日仲係佢結婚12周年，特登拉埋老公仔嚟睇show慶祝紀念日，好替歌迷開心呀！」除了當地的觀眾，有不少歌迷也專程從世界各地飛到美加欣賞Gigi的演唱會，而席間，還有一位很特別的觀眾，就是與Gigi情如父女的填詞人陳少琪的囡囡陳明宜。
巡唱尾聲Gigi感不捨
長達兩年多的「時間遇上我們」世界巡迴演唱會，終於到了尾聲，Gigi坦言很不捨得，提到下半年的工作計劃，Gigi說會開始籌備製作新歌，巡演旅程結束後，是時候沉澱一下自己，好好尋找下個創作方向和靈感。她說：「這個『時間』作主題的演唱會啟發了我很多，一路唱住20多年來累積的作品，當然當中有許多回憶也有些經歷。但我同時反思時間的意義，其實就是禪修中學習的『一個片刻接着一個片刻』，珍惜舊作品帶我們懷緬過去的好時光同時，也不忘每個時刻其實也是個全新的自己，現在我更希望能用新歌令歌迷更認識我！」
