40歲前亞視藝人李創偉（Catry）參加TVB《中年好聲音3》中晒肌跳唱翻紅，雖然20強止步，但人氣急升，IG粉絲數已經突破10萬大關，連「樂壇風紀」甄妮亦在社交媒體上留言鼓勵。隨著知名度上升，Catry再被起底，從家中經營的雞檔，到性取向及4個月內兩度高調宣布當單親爸爸，惹來熱議，關於神秘「身世之謎」，有所保留的Catry只肯爆少少：「我對得住天地良心，冇做違法嘅事！」
中年好聲音3｜李創偉參加《亞洲星光大道》入行
爆肌型男李創偉早於14年前參加《亞洲星光大道4 跳舞吧！》奪得季軍入行，今次轉戰歌唱比賽卻被Foul，坦言不捨得，呆在家中沒有動力，失落兩天，直至和「中3生」一齊去珠海拍MV，心情才好轉。不過，他的進取表現卻獲甄妮支持，他非常感激，並透露因為由細睇TVB 節目大，現已經簽約TVB，最搞鬼從冇諗過做歌手，夢寐以求反而是跳舞及演戲。
中年好聲音3｜李創偉撞樣周柏豪、沈震軒
李創偉獲網民大讚靚仔，跟周柏豪及沈震軒撞樣！亦有被狠批他只得個殼，應該一早要走，Catry就冇唔開心說：「咁梗係有人鍾意你；有人唔鍾意啦，不論好評、負評我都有睇，都會多謝嘅！即使佢哋唔like，都肯嘥幾分鐘去留言嘛。」他較有印象，有留言評論他唱《瘋了》的穿窿戰衣，似足芭堤雅夜場衫；甚至有網民在IG留長文，轟他唱到走晒音：「我重聽多次都唔覺有走音，留言回應，麻煩佢指正走音位，點知被誤會係小器、嬲豬！其實我想進步㗎。另外，見到讚賞有進步時，係開心嘅。」不過，Catry最希望大家能夠看他的內涵，唔想得個殼，所以想每次表演都要有嘢畀人睇到，要不斷增值。
中年好聲音3｜李創偉成名後再挖身世背景
自《中聲3》後，他坦言多了人識：「𠵱家叫做有啲人氣，IG多咗10000個追蹤，成世人都未試過有咁多人留意嘅，有啲唔習慣𠻹，試過坐港鐵時，有乘客對住我做加油手勢。」4年前他在ViuTV戀愛真人騷《阿女又戀嚟》中，曾誠實自爆是男同性戀者，被問到有冇男士對他心心眼時？他避忌更正：「係男女老幼都有。」提到現在成名後，神秘身世背景再被挖出，他則避談道：「要講嘅都講晒，都冇乜好講喇，都係嗰句，希望啲人留意返我嘅表演。」Catry認為外界錯焦點，會對他不公平：「其實唔止係我，就算其他參賽者都係過啲普通生活，我背景都唔係特別啫，每日咪又係咁過，要努力做嘢。我又唔係講大話，除非有朝一日做嘅嘢得到認同，咁我會考慮坐低詳述，或者留返畀自己將來寫自傳！」他相信，佔9成半網民知道他的背景狀況，會表達話OK，會支持：「因為家家有本難唸的經，我屋企有我嘅問題，所以唔可以質疑人哋。」
中年好聲音3｜李創偉去年兩度做老竇
關於撫養的年幼子女「身世之謎」，尤其選擇做單親爸爸惹來熱議，不想多講的李創偉要補充一個Point：「我覺得做單親爸爸係冇問題嘅，我都係來自單親家庭，我嘅子女仲有祖父母，大家唔使擔心，我嘅小朋友唔會有缺失；唯一要交代嘅，就係我對得住天地良心，冇做虧心事，就因此，我非常開心如常生活，照樣同小朋友出街，去公園玩，如果囡囡長大後要參選港姐，咪由佢自己講（身世）囉，由我講對佢唔多公平！」
對於去年於4個月內做兩度做BB老竇，追問是由代母產子，還是領養時？他依然留白：「呢啲唔答啦，係將來出書嘅流量密碼。」另外，有經歷的Catry眼見高菲被網民抨擊「雌雄同體」，肉赤到不平則鳴，留言力挺：「大家應該討論返佢嘅台上表現，大家都係人，冇咩唔同，同樣都要食飯、呼吸、如廁、出糧、交租…既然係咁，點解唔用愛去生存？而係要互相攻擊呢？」
採訪：方騫平
攝影：譚志光
