樂觀與悲觀，乃每個人的自由選擇。一般來說，樂觀者永遠向正面看，也經常事事看到曙光，當然光是樂觀不夠的，必須落實努力執行。
悲觀者，覺得乜都唔掂，日怨夜怨，更甚係乜都卸膊，全非我的錯，一定是政府及其他人的錯。這種心態，非常負面，係人都怕咗你，只會過着灰暗的生活，乜都睇唔到前景。
小弟天生樂觀，無論客觀環境是好是壞，都只視為人生旅途上一道風光，時常研究如何創出新路，絕不會放棄投降躺平。
有危就有機，香港如今吉舖處處，看似令人心淡，恍似冇人想再營商。但香港人天生喜歡做生意，只要計得掂數，自然去馬。問題在，如今仍未能計掂數，加上銀行定期息率高，為乜要冒險做生意？
計唔掂數，因租金及人工仍非常高，兼且不少打工仔冇失業擔憂，導致工作態度麻麻，做老闆的覺得受氣，咁點解仲要做？業主方面，也因早年賺大咗，一方面懷緬過去，一方面仍未蝕入肉，故此租金企硬。
業主、租客、員工讓步共贏
我的想法，是香港必須一齊來次「自救大行動」。客觀形勢，稍後將會慢慢減息，令投資營商意欲回升；業主方面，揸住咁多空舖食穀種，也絕對不是辦法。最佳做法是一人行一步，業主大幅減租，只收基本價，改與商戶合作，一齊谷旺生意，分攤盈利。如此一來，投資者租金負擔大大減輕，起碼覺「有得博」。
另外，老闆亦應善待員工，製造同坐一條船心態，基本薪金外，承諾公司生意好即月月分紅。人人都需要激勵，只要制度設計鼓勵員工拼搏，而佢拼搏後即有成果，自然努力奮鬥，將公司利益與個人利益一體化。目前情況不理想，因各方由自私出發，業主望收最多租，租客望畀最少錢，老闆望將人工壓到最低，員工則希望爭取最多薪金，否則Hea住做兼隨時跳槽。加加埋埋，就是一個負面循環，香港經濟邊會好？
自救就有希望，各利益持份者，只要肯讓小小步，大家合作尋求爭取最大利潤，這才是王道。
資深傳媒人 曾智華
相關文章：
