早前《中年好聲音2》季軍顏米羔（米仔）在44歲正日生日遭朋友追債「贈興」，債主公開對話截圖，揭示了風光生活的米仔：「生活精彩但未有落袋」。其實米仔在事件曝光前已積極打拼，爭取每個賺錢還債機會。之前他以嘉賓身份參加由「光頭仔」王嘉明帶領的2日1夜新會旅行團，期間狂出招冧爆「米飯班主」，加插玩「猜猜我是誰」遊戲時，被姨姨米粉(粉絲暱稱)貼晒身黐到實，也笑住受落。另外，米仔向《頭條日報》首揭走數真正原因。 採訪：方騫平
麥嘉「光頭仔」王嘉明之前做團長，帶50位Fans團友到新會玩2日1夜，除了顏米羔做嘉賓外，王嘉明媽媽及兒子、米媽也有同行。有米仔助陣帶出搞笑氣氛，兩人合拍地大唱「破地獄吹啲打」版生日歌為壽星Fans打氣；又為Fans特設晚間睡衣派對，散團前還搞了個交流會和Fans互動。派對上臨時加設玩「猜猜我是誰」遊戲，平日Cool爆的米仔換上可愛兔睡衣，用兔耳遮住雙眼摸頭來猜猜Fans名字，落力冧爆一班「米飯班主」，一班米粉圍到實搶住玩，師奶兵團笑到見牙唔見眼，還挨住及蹺實米仔合照，勁開心。
王嘉明會做返歌手
米仔失落時有米粉撐，形容好開心有屋企人的感覺：「大家互相支持，我好貼地嘅，我唔係神只係人，都會食飯去廁所…」43歲「中2生」王嘉明處男搞旅行團，感激有兄弟互撐，不過，下個目標他會做返歌手，𠵱家努力操肌，他坦言：「唱歌呢門生意確實唔係賺到錢，我只係想做啲嘢，畀人知道王嘉明未死，會做啲與時並進嘅音樂啫。」米仔同意說法，還不忘叮囑嘉明，搵他拍MV時記緊封利是！米仔承諾更會發力搵錢：「今年會做多啲嘢，除咗唱歌、執導電影，更會加埋攝影，去年底搞過收費攝影活動《你是我的眼》，用1小時幫米粉影下相，傾下偈，用相片寫出對米粉嘅體驗，但都有畀人彈係『割韭菜』，我唔理得咁多啦，感恩仲可以唱到歌及做到擅長嘅嘢，其實呢啲係個專業。」他強調做人要嘻嘻哈哈：「唔使咁複雜，我唔鍾意計算嘅，所以都好怕畀人計算…」
不是外面說的風光
另外，欠債事件曝光後，顏米羔隨即向追數人償還2萬元，另加5千元利息，並在社交平台貼圖大呻：「我都唔係你睇咁風光，一直在努力中。」當被問到可有其他債仔時？米仔冇正面回應，避開話題說：「我都講過，比賽咗大半年時間好難兼顧工作，真係『你睇人好；人睇你好』，而且大家都明白自由工作者嘅苦況。」他自爆自己同樣做過債主及債仔兩個角色：「今次我冇企喺追債主角度感受件事，係我唔啱嚟嘅。」
承諾會戒除壞習慣
他還首揭「走數」真正原因：「我唔係賴帳，經常Keep住有幾百個message冇睇，任由佢哋沉咗落底，有時清咗一半又放棄，如果清得晒，我諗就唔會Miss任何嘢，但呢啲點都係解釋唔到嘅。」經此一役，提醒自己要戒掉忽略訊息的壞習慣，並認真說：「經一事長一智，唯有努力向前囉。」他感慨人生會不斷出現困難，都係要不停解決問題，要做好自己，勇敢面對，積極面對去生活。」最後，米仔多謝《星島頭條》最正面的報道，還再次要向苦主致歉：「再講多次對唔住囉，搞到佢咁唔開心係我嘅疏忽，係我唔好…其實我係苦主嘅師傅，有教過佢嘢，就算身為師傅都會有出錯，今次體驗到喺每個人身上都有嘢值得學習，呢個世界上冇聖人，要活到老學到老。」
