京東（9618）打入香港市場，推出「買貴就賠」吸客，並落廣告向本地商戶「挑機」。不過本港電商龍頭香港科技探索（HKTV，1137）不甘示弱，創辦人王維基發文指，京東香港的手機App有八、九成模仿HKTVmall，更直指其「買貴就賠」推廣其實不包括HKTVmall，反問「係睇我唔起，定抑或因為唔夠我哋平？」火藥味甚濃。
指App界面與HKTVMall八九成似
王維基在facebook專頁發文，指京東香港的手機App與HKTVmall有八、九成相似，「連圖案都『學』得似模似樣，把我們抬舉了。」他在文中舉例指，京東與HKTVmall均為鑄鐵鍋提供「日日秒殺價」，京東標榜338人民幣（約360港元），而HKTVmall標價為499港元，不過原來只是排版相近，實際上是兩個不同牌子。王維基亦直稱：「呢兩日就有朋友問我，呢個係咪假Apps？」
王維基：你兵不厭詐、我兵來將擋
王維基在文中更「直線抽擊」說：「既然係咁，為什麼你的『買貴即賠』只包括百佳、惠康、百老匯和豐澤？為什麼不包括我們HKTVmall在內？」亦稱「你兵不厭詐，我兵來將擋」。
京東鬧市廣告牌「挑機」
京東近日宣布擴大香港業務，推出自營家電全品類「一件包郵」、30天內直接退貨等，更推出「買貴就賠」服務，由即日起至4月30日，在京東購買自營商品，包括電腦、家電等，下單後如發現京東商品價格，比本地指定平台同款商品價格高，可在商品確認收貨後24小時內申請差價補償。
京東更用銀彈攻勢，在鬧市投放多幅巨型廣告牌，疑向大型電器舖「挑機」，標語包括「兩層樓嘅電器舖，唔賣得貴點夠交租」、「又平！又有售後服務！唔知人哋做唔做到？」、「我哋冇明星賣廣告，但我哋有壞包換新」等等。
相關新聞：
內地電商攻港掀「包郵大戰」 拼多多最平 京東靠服務取勝 實體店成港商僅餘優勢？
京東迅速回應 再推免運費優惠
京東晚上在社交平台以廣東話回應王維基的指控，稱「完全明白王生對於京東開拓香港市場的疑慮」，但強調並非「要同邊個鬥」，只望帶來優惠給香港人。不過，就京東手機App與HKTVmall有八、九成相似，則沒有回應。
京東回應全文︰
「多謝王生 （@Ricky Wong）對京東的關注，我哋完全明白王生對於京東開拓香港市場的疑慮。不過京東嚟香港，唔係要同邊個鬥，而係想將真正的着數帶俾每一位香港街坊。 一直以嚟，香港市民都要面對比內地高好多嘅物價，當中包括高昂的租金、高昂的運費以及高昂的服務費。京東的營運模式係自己做貨、自己起倉同送貨，將成本壓到最低，絕對有能力將世界各地的優質貨品，以更抵的價錢、更好的服務，送到香港每家每戶。 既然王生開咗個頭，我哋都好樂意同你比下邊個對客更好。我哋正式宣布：京東App喺香港今年已經全面推行全類別滿188蚊免運費送上門服務！另外，由而家到6月底大家電銷售旺季，所有香港客買的京東自營家電，我哋都會免費上門安裝！ 希望各位香港市民會鍾意京東，多啲俾意見我哋。如果客人發現同一款貨品京東賣得貴過其他平台，我哋會實行「買貴就賠」。歡迎大家follow我哋的賬號。我哋亦期待王生可以同我哋一樣，用實際行動為市民謀福利，讓香港消費市場更加繁榮興旺！」
