每當我在本欄分析一隻股票後，身邊及網上，會有四種反應：第一種是幾時入及入幾多最着數或賺最多呀？（冇腦！從來唔自己學分析，永遠等人餵食，賺咗哈哈笑，蝕咗一於姓賴，唔關自己事？）
第四種人活在負能量最可悲
第二種是睇吓你準唔準先，結果等吓升一日，等吓又再升一日，死啦升咗咁多，好決定上船，結果錯過最佳時機。（例如我3個月前建議入維他奶，呢類老友就由9元睇，睇到11元才覺得執輸行頭慘過敗家，然後湧入。結果股價升到近13元回頭，最低再跌破9元，此時揼心揼肺狂問應否止蝕跳船。）
第三種是唔貪唔驚，堅守一成出入準則。（去年11月曾見9元然後升上12元多，之後兩度跌回9元以下，然後又再升近9.8元，意即呢類投資者，短短4個月已賺咗3轉1成利潤。）
第四種是唔買唔賣，憎人富貴厭人貧。呢類Haters最喜歡在網上留言。股市升時粒聲唔出，一跌即大踩特踩揶揄貼士「屎」，純發洩而無分析能力。
以上四類人，最可悲當然屬第四類，日日活在負能量的黑暗世界，不敢用真名論理。這類人，永世冇可能成為理財高手或成功投資者，因拒絕開竅。
維他奶中長線可高過12元
上周維他奶又唔聲唔聲展開升浪，點解？正是兩大股東開始暗鬥。原大股東羅家在9元以上密密回購，消息曝光後，投資者立即跟進。而另一邊明刀明槍收購的新加坡黃氏家族，也從未停手透過證券集團吸貨。
究竟今次角力會維持幾長，以及對股價產生幾大影響。我冇水晶球，只可告訴大家，小弟9元左右買入的貨，一股都未沽過，係咪早前已經走咗雞？細眉細眼睇，當然係！但我對維他奶估計，中長線絕對在12元以上！反正唔等錢使，當交遊戲費又考吓自己的眼光。
上周四電話不停響，正是文中首3類老友不停問：「維他奶好似又開車喎，碌Sir，應該再『飲』多幾公升定趁機『吐』返肚內的出嚟呀？十五十六呀！」老友，你係我點答？
資深傳媒人 曾智華
相關文章：
NJZ如期赴港感動全場 Cityline卻拖垮觀眾體驗？｜梁偉聰
