恒基兆業創辦人李兆基 – 四叔溘然長逝，享年97歲。消息傳出後，香港社會各界紛紛致哀，這位商業巨人，以獨到既投資智慧與務實既經營哲學，締造了橫跨地產、金融既商業帝國，更以謙和親民長者風範，寫下香港資本市場既傳奇。
李兆基的商業DNA早在戰火中萌芽。生於廣東順德金舖世家，13歲做掌櫃，20歲帶著1000元膽粗粗隻身來港，在文咸東街開設「永業銀號」，為日後地產王國積累第一桶金。
上世紀五十年代，他與馮景禧、郭得勝合組「永業企業」，首創「分層出售」模式，將香港住宅從傳統唐樓推向現代化分層單位。1963年三人另立新鴻基，十年間建成逾20個屋苑。76年李兆基自立門戶成立恒基兆業，以「貨如輪轉」策略專攻舊樓收購，高峰期每年併購逾40棟唐樓，被業界稱為「舊樓收購之王」。1996年上市時，恒基土地儲備量達1.8億平方呎，相當於港島總面積的14%，「麵粉多過麵包」的儲地哲學，成為抵禦地產週期既盾牌。
四叔如何走上成功之路， 其實不用多講，隨便在網絡上搜尋佢既Bio，海量資料一覽無遺。 反而筆者想講一講，係擔任財經記者期間同四叔嘅互動。 佢比我嘅印象就係「好可愛」!
2006年筆者踏上財經記者之路，主力跑地產新聞，恒地大公關Bonnie姐當然要識。 當時港股正值處於向上爬升周期， 對四叔來講「地產是主食，股票是甜品。」
有一天，Bonnie姐話四叔想搵傳媒傾計講股市，於是2007年有好幾個下午，一班傳媒朋友跟四叔來個約會，位於IFC高層橢圓形檯會議室， 沒有階級之分，圓桌傾偈平起平坐， 四叔小心翼翼喺西裝袋淘出「貓紙」， 話俾我哋聽佢點樣親自操盤， 如何睇好港股。言談之間發揮強大親和力， 非常可愛。我相信在場冇人會覺得我哋係同緊超級富豪訪談， 相反係同一位可愛老爺爺閒話家常。 我記得，四叔講到唔捨得走，要Bonnie姐一再催促，先同我哋講拜拜。 之後，市場就出現對四叔「亞洲股神」、「香港巴菲特」嘅讚譽。
四叔的「可愛」 喺高管Interview亦可見一班。 佢份人做事認真。 話說有高層見工，四叔喺櫃桶攞出厚厚拍子簿，記低幾十條題目， 逐條仔細發問，對高管任用顯出嚴格、細心和重視。
投資有贏有輸，四叔都唔係「逢買必贏」。 當年港股受到金融海嘯衝擊，四叔預估失靈，他也有自嘲是「冒牌股神」， 這又是一個可愛之處。 試問有幾多個超級富豪可以有呢一種謙厚精神？
不過講到人際關係，佢一定贏晒人心同民心。
恒基老臣子、執行董事孫國林在追思會上形容李兆基為「絕種好老闆」，更以「恐龍老闆」比喻其罕見的仁厚風範。孫國林追憶：「跟隨四叔28年，從未見他發脾氣」。 筆者一啲都唔意外。
而作為一個女性，目睹千億新抱婚前婚後行事作風沒有綁手綁腳，仍然可以自由自在， 出席任何場合，沒有顯露豪門的約束， 就知道呢位老爺胸懷厚度，有多可愛!
筆者對呢位絕種「恐龍老爺、老闆、老人家」特別唔捨得。希望四叔的「可愛」，在恒地、 家族以致世界繼續承傳。 永遠懷念四叔。
相關文章：
美國百萬富翁靠一資產致富 每月定期投資 李聲揚：時間是你的朋友
