向氏後人向展鵬（Jeffrey）將奢華生活方式放上社交網成為熱門話題，無論名牌穿搭、豪華度假及高檔餐廳美酒佳餚都成為網民羨慕對象，晒命相及視頻不僅吸納近8萬粉絲追蹤，也引來負面批評，對於被廣泛討論，Jeffrey有話要說：「呢個就係我生活，邊個有錢人唔用靚嘢？」他更直言，其實邊個不想威？社交網就是用來晒的平台。生活無憂的Jeffrey還自資近百萬出歌及拍MV圓少年夢！ 採訪：方騫平 場地：Gentry Club
向展鵬不只是「影壇大佬」向華強及向華勝的侄仔，還是收入驚人的「保險界猛人」，熱愛唱歌的Jeffrey前年參加《中年好聲音2》，雖然60強止步，但卻唱出歌癮，最近自資近百萬推出4首歌，其中由細聽到大，最喜歡的《問我》已錄好，隨時在網上平台上架。
出歌辛苦到頂唔順
54歲的Jeffrey處男出歌，他笑說：「出歌係我20多歲時嘅夢想，去到退休年紀，趁自己個樣唔差仲見得人咪出下歌囉，哈！應該仲會有fans嘅，我個IG有7萬多粉絲追蹤，但我冇畀錢買喎！」經過《中聲2》的不安，曾於60強時因為在後台叉錯腳跌親，流住血，腳都震晒影響到表現被foul，最後搞到暈過7次兼面癱，今次Jeffrey只是諗住出歌玩下，不跑宣傳，不想有大壓力，可是做落發覺玩大咗：「練歌好辛苦，練咗幾個月只錄完《問我》，個MV仲要改咗5次，𠵱家專注緊第2首新歌，日日要唱10幾次唱到好悶，跑步50幾分鐘，又要上堂及錄音，真係辛苦到想死，自己唔係歌星嚟，真係頂唔順，原來諗同做係兩樣嘢，當唱歌興趣變咗職業就完全接受唔到，我已變成唔鍾意唱歌，因為被逼係Enjoy唔到嘅。」
網上分享生活體驗
多年來買咗千萬愛馬仕服裝及包包而成為VIP的Jeffrey，月中將會被邀到巴黎睇馬術比賽、參觀酒莊及旅遊：「香港只係邀請咗3位VIP，所以都好興奮。」對於Jeffrey不時在網上「晒命」，就連年前入院都不忘大晒3個名牌包包惹來關注，他卻說：「𠵱家經已少咗出IG Post，同埋回收返好多舊帖子啦。」他再剖白：「我真心唔明，邊個出Po唔係晒？個個都要面子，邊個唔想威？好似捐血相、公仔掛飾、甚至一杯茶都會放上網，覺得得意咪同大家分享下囉，冇理由講唔開心嘅嘢啫，社交網就係用嚟晒嘅平台，要遵守規則先得，唔晒要嚟做乜？而且呢個就係我生活，係我日常用嘅嘢，唔係借出嚟晒，係分享靚嘢，我平時唔係咁就話啫。」他甚至坦言係少爺：「我唔使靠屋企人，年薪都唔少，今年就算交稅少咗都繳咗300幾萬，但我已經唔算係勁，只不過屬中游比一般人好，我身邊嘅人都用靚嘢啦，邊個有錢人唔用靚嘢？尤其有錢嘅老一輩，我媽咪會化妝襯晒啲衫出街，爸爸就打領呔着西裝。」
邀林青霞出山拍戲
另外，他又指爸爸向華榮原先想投資2億人民幣在內地開戲，交由他及妹妹策劃，連導演、劇本、巨星主角、批文都定下，但洽談過程中有些事有伏味，最後無限期押後：「始終呢啲市道攞嚿大錢出嚟要認真考慮，我反而冇興趣拍戲，最多爭取唱下主題曲及片尾曲。」他自爆曾忽發奇想打過林青霞主意：「可能佢做做下少奶想玩下啲特別嘢呢？咁啱有次見到林青霞，隨意問佢『我爸爸想開戲，拍唔拍戲呀？』佢竟一口婉拒，話『我有30年冇演戲啦。』」
