陳果監製電影《淺淺歲月》，搵來兩屆金像獎影后葉童出演女主角「靜芬」，雖然角色很寫實易投入，但原型正是投資者本人，已令葉童有一定顧慮，而陳果還作新嘗試，全片以手機來拍攝，連經驗豐富的葉童拍攝時一度不知所措，因擔心出來效果而感到不安，結果出來效果令她放下心頭大石，更笑言：「好彩我當時冇畀太多聲氣！」採訪：杜杜 攝影：羅安強
《淺淺歲月》改編自小說《完了，就是緣》，而小說作者正是電影投資者兼編劇之一的謝淑芬，而故事正是她的親身經歷。葉童收到陳果邀拍感開心，笑言「監製咁睇得起我」，而最難得是角色以女性角度出發，「聽到呢個戲，就覺得點會有人拍個咁樣嘅戲呢？！以一個女人角度去講故事，真係好少有，我係好開心、好鍾意，作為女演員好想演一部戲。」女主角色「靜芬」原型人物正是投資者，葉童最初有點無所適從，「一般老闆大概會知道佢模式係點，但呢個唔係正常老闆，唔知佢要求係點？佢係拍緊自己，好似有個使命感，好想用作品留低自己嘅故仔，過程裏面我都喺度諗，佢會唔會不停咁話呢句唔講得，嗰個唔拍得呢？！」陳果即解答，「其實係有嘅，不過係喺改劇本過程中，老闆會雕琢吓，有啲嘢唔係咁講。」
平凡故事中找不平凡
戲中「靜芬」事業有成，但丈夫出軌令婚姻失敗，跟仔女關係亦不理想，雖然跟婚姻幸福又沒子女的葉童相差好遠，但她投入角色也不難，「呢個角色好有熟悉感，好似身邊嘅朋友、屋企人會有嘅經歷，好似同我好同步，我好似好能理解佢嘅心情、情況，我見到佢時，會感受到佢內裏有份執着，無論對佢嘅人生或者工作，我就捉住佢呢種好固執好硬頸性格去做，當我演呢個戲時就會自然而然朝住呢個方向。」故事是個真實人生，並不似一般劇本有戲劇性，陳果坦承花了很長時間作修改，「故仔都係老生常談，都係啲夫妻離婚個案，呢啲咁簡單嘅民間故事，某程度上係幾難拍，所以前前後後劇本改咗差唔多11稿，開頭係幾傳統寫法，傳統並不是壞處，但咁平凡嘅故仔又冇突破性，要諗吓有冇啲新角度去做。」這番話令葉童終明白，電影等了多時才開拍原因，「監製搵完我好耐未冇消息，都諗住算，其實耐唔中都會遇到呢啲情況，始終個題材唔算可以賺錢。」
想試新嘢絕非為慳錢
電影全片以手機進行拍攝，陳果強調並非為了慳錢，反而是帶點實驗性質，「我同投資者傾時已經有咁嘅想法，喺傳統工業入面都會覺得用電話拍使唔使呀？！我最大原因係想試吓新嘢，外地都做咗用電話拍，點解我哋仲要固步自封，一定要用啲傳統方法去做，呢個反而係我最想做嘅嘢，完全唔係因為想慳錢。」陳果承認用手機拍有些情況會更易處理，特別是拍攝街景時，「喺街上嘅戲都幾自然，大家對於舉電話已經習慣咗，所以冇人會理你，出嚟個畫面效果可能會更好。」另一個好處，就是可以精簡製作人手，「Crew係少咗好多人，一般日光日白拍唔使補光，只係夜晚先要補多少少光。」不過葉童卻不認同，還投訴：「但其實我覺得有光會靚啲囉！哈哈！」
手機拍戲有不少好處
面對用手機拍攝整套電影，連經歷豐富曾兩度奪得金像影后的葉童，對於這個第1次也感不安，「開始時有少少失落，因為係好唔肯定，唔知道個方向係乜嘢，會諗呢個話面出嚟會點呢，因為預測唔到，有時會用4部手機拍，我又唔知分佈咗喺邊度，同埋咁多年都真係慣咗對住機器，但後尾去到個地步係算把啦！我專注返同對手演嘅戲，不過放開去做，嗰種感覺都好舒服、好輕鬆。」拍攝後期，她開始發掘到手機拍的好處，「譬如喺電車上拍，電車空間有限，如果用傳統機器，大家都會好辛苦，但係手機真係好方便。」陳果進一步解釋好處，「我哋一上電車坐低就可以拍，咁窄嘅空間仲可以有2部機對take，2個鐘就拍晒，手機嘅方便就係存在價值。」看到電影出來效果，令葉童更加放下心頭大石，「我最擔心出嚟嘅清晰度，但係最後個片比我想像中好好多，個銀幕咁大，唔係好覺有雜質，好彩我當時冇畀太多聲氣，一直都好配合啫！哈哈！」
