男團MIRROR日前推出新團歌《手印》，今日（3日）就到商台接受《叱咤樂壇》訪問，其中隊長Lokman ( 楊樂文） 、Anson Lo （盧瀚霆）、Ian （陳卓賢）及Stanley （邱士縉 ） 4子因工作未有現身，現埸有近200粉絲守候，有姜糖高舉「姜」字旗，更有粉絲疑為爭位仆倒，據指，昨晚及今早均有附近住戶報警投訴。訪問中8子大談新歌MV趣事，笑料百出，更嘲今日不在埸的Stanley 是「機心表」，而姜濤則直言團隊班必定有爭拗，但12子經過七年的日子仍然團結地走下去。
歌曲概念由Lokman提出
去年MIRROR 為配合巡唱，推出三首團歌都以節奏澎湃的快歌為主。今年第一首團歌則一改曲風行溫情路線。原來歌曲概念是由隊長Lokman 提出，Lokman 希望MIRROR 會有一首跟RubberBand 《發現號》感覺的一首歌。其後，Edan 就爆料指為了歌名，成員之間嘈交，Stanley 想用《指印》、Anson Lo 則想《紫印》，8子邊笑邊說，謝茜嘉即笑言可信性好低：「唔知係咪真，加上有啲人唔喺度又冇得反駁」。
Frankie獲封「crying輝」
收到歌詞一刻，Jer 坦言覺得是MIRROR 一個里程碑，「對於掌印我覺得係好siguture 嘅一件事，由《造星》素人，到而家每個人都可以獨當一面，覺得係一個里程碑」；Edan 則表示歌詞好洗腦，特別是「留低一打掌印」這一句，感覺好團隊好窩心。Frankie表示聽完呢首歌好有畫面，由出道到而家大家經歷唔同挫折，好似走馬燈咁，而他在MV亦不禁流出眼淚，即被隊友封為「流淚輝」、「crying輝」相當搞笑。
12子成熟兼有默契
姜濤曾表示最喜歡就是這一首團歌，他認為以往MIRROR的歌曲都給人溫暖的感覺，但這一首歌就有所不同，「呢首歌唔同嘅地方，係話俾大家聽每一個團隊一定有爭執嘅時候，踏入第七年，都想好真實咁話俾觀眾聽，我哋唔係真係完全時時刻刻好團結，我哋都會喺工作上有爭執，當我哋12個一齊嘅時候，點都好，我哋都係對外，來到第七年我哋都會好團結咁繼續向前行。」問到MIRROR 經過七年的相處，如何面對爭執，Jer 坦言近年大家都默契多了，無論情緒或者處事方便，大家都知道會點樣去處理，團隊都會互補，亦沒有了拍枱對抗那一種爭執； 而Edan 亦補充，其實不是大家想像中的拍枱反面，加上大家都成熟了，越來越有默契。
AK有「嬲爆」團火
提到MV邀得彭秀慧執導，8子都認為感覺像拍戲一樣，姜濤更大爆原來MV 中AK 與Edan 打交一幕，原本是由他及Ian 上演，但後來因為彭導留意到AK 有着「嬲爆」個團火，最後易角由AK與Edan 上陣，而姜濤則負責做和事佬拉開二人，姜濤續指AK與Edan 都好大力，完全拉唔開二人，最後靠Lokman超大聲喝止。8子繼續爆MV的笑料，其中開首一幕，彭導要求各人都要表現準備比賽的狀態，心情沉重低落，有人着襪，有人抹頭盔，而Frankie 就認為要熱身，於是他就做出踢腳的動作，誰知釘鞋踢落地卻產生「撻撻聲」，他笑言：「做咗一下都覺得唔對路，但都要繼續做落去」雖然最後都會配上MV音樂，但彭導亦表示：「真係唔得」而眾人都表示當一刻忍笑忍得很辛苦。
Edan 說Stanley 係「屎窟鬼」
另外，他們再爆MV中邀請了一隊專業美式球隊給他們作示範，其中一個動作球員圍圈大嗌，Edan 形容他們講了一堆英文，然後12子都唔知佢哋講緊咩，惟有叫Lokman 照嗌，一roll 機Lokman 就以「外星話」大叫「Lulula」，令到他們哭笑不得。接着Edan 又爆Stanley 的笑料，更大膽指對方是「屎窟鬼」，「本身最尾嗰幕係good take，講我哋12個簡單過鏡 ，我哋11個走晒之後， Stanley係最後一個，但係佢仲加戲俾自己un 吓un 吓，搞到又要再拍過」加上MV 中Stanley 再曬肌，成員都笑封他為：「機心表」。訪問尾聲，8子談到來年工作都非常口密，只賣關子表示應該會至少有三首團歌，亦會有團綜，而Tiger 亦會於本月推出個人單曲。因工作未能出席嘅的Stanley 原來亦有聽訪問，他更在社交網hashtag Edan 笑言：「做我啦 做我啦」 ，Edan 則轉發並回覆：「咪屈」。
向電台大閘外數百「鏡粉」揮手
8子於傍晚6時完成所有電台訪問後離開商台，並停下來讓傳媒拍照及做了一個簡單訪問，問到Tiger 即將推出第二首solo 歌，他就透露繼續有結他，曲風比較搖滾，而AK亦有份參與，至於，選擇3月12日推出，有傳是刻意擇吉日出歌？ Tiger 表示只是巧合，是公司的揀，而剛巧那天正是他媽媽的生日。至於，由Ian、Jer、Stanley和Tiger 組成的「禿鷹小組」，將於4月12至 13日在西九竹翠公園舉行戶外騷，門票今日開賣就火速售罄，Jer 就坦言非常開心，並期待現場首唱小組歌《吃腐肉的鷹》。被問到其他小組今年會否同樣開演唱會， AK就透露如「禿鷹小組」賣飛情況理想，其他小組亦有機會跟隨開騷。8子其後從商台正門步出，沿路向電台大閘外的數百粉絲揮手，掀起全埸尖叫聲。
