現年29歲的黃靜藍曾與年長13年，剛修短暫出家的李日朗（Don）拍拖5年，然而2023年11月黃靜藍在冇預警單方面向外公布分訊。二人分手3個月後，黃靜藍便晒出與擁有餐飲王國的餐飲集團執行董事富貴男友Wilson同遊紐西蘭的相片，今年初宣布雙喜臨門，被指是心機女的藍藍因而成熱話，然而晉身闊太的她卻懶理，並強調：「佢哋鍾意講乜就乜啦，只要自己及朋友明白及知道就得。」 採訪：方騫平
雖然「升呢」人妻及即將為人母，但黃靜藍並冇「躺平」，今年初更大住個肚為HOY TV主持飲食節目《開飯喇》，可以盡情食。藍藍更話平時工作太忙，未必可以為Wilson入廚煮飯仔，但最擅長蒸肉餅、蕃茄炒蛋及蒸水蛋，還自豪蒸餸最撚手。
對於急做富貴人妻，她解釋啱就結：「好難講鍾意佢乜，我哋性格好啱，3觀好夾，睇未來嘅嘢好相似，可以一齊進步向前，而且大家又鍾意小朋友。」她忍不住口晒甜蜜：「佢好細心好錫我，不過，就冇要求我婚後做少奶奶，因為佢知我好鍾意自己份工作，大家都好珍惜機會，我都要努力賺錢啫。」
被指下嫁有米老公成熱話，連Don舊愛，同是HOY TV主持的樂翊榆都在社交平台發文暗串藍藍說：「好多心機女，為求有人幫自己埋單，就盡快令到自己大肚懷孕。所以我不主張婚前性行為。結婚應該為了愛，與三觀一致的人一起，而不是責任」，火藥味甚濃。
藍藍沒好氣說：「明白一定會有閒言，佢哋鍾意講乜就乜啦，只有自己及身邊朋友知道就得，其實所有嘢都係緣份嚟。」她指老公都要努力工作。講到兩人的緣份，她表示4年前靠有線電視《靚女掃貨團》節目認識：「當時首拍有線節目介紹食店，咁啱被安排訪問Wilson，不過，當時各有另一半，只係隨便交換咗個IG ，直至多年後大家重遇時已變單身，就相約出嚟了解下，結果一拍即合。」
