主張承傳演藝界接班人的「3屆視帝」黎耀祥，今年突破「最佳男主角」候選人框架，華麗轉身成為視帝頒獎嘉賓，在台上頒獎給戰友張振朗，身體力行支持新一代。60歲黎耀祥演戲近40年，曾拍過多於100套TVB劇集，即使係「兩蚊車優惠」，仍堅持在長者階段也要活到老學到老，拍戲以外尋找其他演出機會，甚至揭示未來將會有發展新動向：「唔排除將來變身旅遊達人專攻旅遊節目。」 採訪：方騫平 攝影：林賓尼 場地：hotel icon the market
近年旅居中山的黎耀祥和太太梁耀蓮（Julia）最近回港食好西，趁住正月食三文魚蔬菜沙律，最想越撈越起。兩公婆更Sweet爆你一啖我一啖互相餵食，結婚28年，兩公婆恩愛不變，祥哥自爆從來冇誘惑出現過，卻非「跟得老婆」功勞。
命中注定冇桃花命
祥哥話自己太怪是冇女埋身原因：「自己係怪人一個，少少應酬都唔去，超過20年冇去食消夜，『宅』到一收工就馬上返屋企，零社交根本就唔會有機會發展婚外情，加上我44歲先成為視帝，喺嗰個階段唔再係年青人心態，家庭經已安定晒，而且攞完獎之後每年要拍4套劇，要諗個角色，鬼叫自己冇本事要將勤補拙咩！經已長時間冇覺瞓，仲要返屋企交人…所以我好信命，我冇桃花命，身邊朋友都物以類聚，劉青雲、黃浩然、曹永廉、蕭正楠個個性格差唔多，都係內向家庭型。」祥哥還有一個信念：「只要你對人哋冇興趣嘅話，自然唔會望多兩眼，人哋一定會感覺到，仲點會行過嚟埋身呀？」他再搞笑補充：「以前我仲乞人憎呀，因為唔想浪費人生等埋位，每次都會帶3本書入片場睇，有生人物近feel！」
帶埋老婆大開眼界
提到新一年目標，他自爆會轉新方向：「演多年戲都想睇下有冇其他演出機會，希望多元化試多啲新嘢，拍多啲直播短視頻。」去年底他和麥包(麥長青) 拍旅遊節目《江湖見》，兩人走進已故武俠小說家金庸筆下的江湖世界，穿梭8大省份浙江、江蘇、湖南、湖北、陝西、福建、貴州、雲南，遊歷接近20個城市，介紹當地獨特的風土民情、歷史古蹟及美食文化，包括「華山論劍」中的華山、小龍女終南山重陽宮等，帶埋老婆一齊去大開眼界。問到日後可會專攻旅遊節目？他坦言：「都唔出奇㗎，始終係一種見識，以前自己好少去旅行，因為由『跑龍套』出身，好怕會失去任何做配角機會，所以𠵱家幾難得，帶埋老婆去觀潮，寓工作於娛樂！」
開價平受老闆歡迎
至於是否搵夠上岸？祥哥就話自己生活得好簡單，不會花錢追求物質：「同老婆初相識時，件衫着咗10年，着到穿咗窿都未掉，鞋櫃僅得波鞋及皮鞋各一對，之後才添置啲見得人嘅衣物。」當追問𠵱家可有吸金過億時？黎耀祥即否定：「一定冇，𠵱家搵落嘅係揼石仔揼返嚟，我收得好平，所以老細鍾意執平貨搵我，哈！你估我係家燕姐咩？𠵱家呢個市邊得呀！成世人搵搵埋埋唔消費都未必賺到半億呀。」他自言只求兩餐溫飽、着得暖、夠瞓經已好開心，最重要冇經濟壓力：「人最好係咁，錢再多都係放喺銀行，夠就好囉！」
