索爆1996年港姐冠軍李珊珊，因患上驚恐症神隱多年。最近李珊珊打破隔膜公開露面宣布復出，身形變大幾個碼的她，坦言haters集中笑她胖，變成盧覓雪，但覺得係「褒」，還說聲「多謝」。
1996年香港小姐冠軍的李珊珊，憑擁有樣靚加魔鬼身材加入演藝圈，可謂事業愛情兩得意。李珊珊曾參演劇集《烈火雄心》與錢嘉樂撻著相戀，更被稱為圈中的「金童玉女」，最終兩人九年情玩完，回復單身的李珊珊，桃花不絕，更與芬蘭車神及前世界足球先生相繼傳出緋聞。
李珊珊5年前公開患驚恐症
不過李珊珊在2005年開始減產，更一度傳出患腦癌及抑鬱症，直至5年前，李珊珊為《精神健康基金會》擔任「傳晴大使」拍攝宣傳片，首次公開承認患上驚恐症，並分享治療過程，但可見她身形變胖。雖然李珊珊公開承認患病，但一直保持低調，未有出席任何公開活動。去年10月，李珊珊宣布成立YouTube頻道「三坐山」（Mount Trio），依然未有在鏡頭前現身，間中只在鏡頭外發聲。
宣布復出的李珊珊，大方面向鏡頭無所不談，她表示推動力是認為這一生要好好活下去，不想再浪費時間，加上對情緒病有不少資訊，可以跟別人分享，何不做更有意義的事。她說：「我咁嘅年紀都要識為自己打算，要有自己事業可以財富自由，我知自己身體健康有問題，都希望有好嘅醫療畀自己，呢個費用唔少，我要自己叻，賺錢畀自己。」
相關閱讀：李珊珊激罕露面！與視帝好友合照笑容滿面 預告做直播：這個女人終於現身
李珊珊自覺患病令眼界擴闊
神隱7年的李珊珊，笑言匿埋默默地在網上睇到好多資訊，繼而有信心建立網上頻道。現在的她很享受每一秒放在這裡，反而不會理會結局如何，有些作品出來，自己也覺得有滿足感。她說：「我自己出身喺呢個圈，從小亦好喜歡睇電影，睇得多自然會識點樣去製作，當然唔會專業到識點剪，但都會知道分鏡所有嘢，然後慢慢認識到自己都能夠應付到喎！我先至咁大膽做呢個平台，之前有好多阻力，但個天有時開路，做做吓又有啲人嚟咗，又多少少，就發現可以做個平台，而唔係個人頻道，所有嘢係少少咁渾然天成返來。」
李珊珊以生命影響生命，公開患上驚恐症，以過來人身份分享患病情況及治療。她指，能夠以第一身鼓勵別人，不少人對這個病認知薄弱，有共鳴或適當的資訊也很少，自己可以分享如何活過來及面對生活，反而覺得患病令自己擴闊眼界。她說：「如果我唔識個醫生，就唔會接觸到咁好嘅醫療過程，我知道相比其他情況，原來我係幸福嘅一位，亦想為其他人爭取幸福，一定要過來人身份先分享到。」
李珊珊患驚恐症頻痾嘔、呼吸困難
李珊珊坦言，以艱難探索來形容自己患上驚恐症，初時她不明白為何身體機能出問題，例如痾嘔、呼吸困難、心跳好快、標冷汗等狀況，有瀕死感覺，原本想拖延睇醫生，後來情況越來越頻密要入院，當病發後會肚瀉，亦好頻繁發生，睇過腸胃及心臟專科，最後嘗試睇精神科專科。她說：「點知敲中呢科！嗰下真係如釋重負，因為我終於搵到條出路，有答案，知道點處理，係咪有得醫！無嘢開心得過之前嗰一、兩年係咁摸索。」
面對驚恐症，李珊珊坦言就算出門也需要很大勇氣，現在也會有這情況出現。不過她會跟自己說不要怕，要跟它共存，因為驚就會肚痾，但笑謂還好，頻道平台拍攝現場附近就有洗手間，又設備齊全，發現自己減少肚痾。李珊珊又指，主診醫生觀人於微，也很信任對方，亦會跟隨醫生指示去做，現在藥物量相比最高峰時已大減八成。談到患病後可會令她變得豁達，李珊珊引用參與節目嘉賓的一番說話「無常先練出結果或因果」，她說：「喺一個無常、唔知點解發生咁嘅嘢，但過程中好似練丹，練出你自己嘅果實。」
相關閱讀：李珊珊宣布復出幕前終露面！戰勝驚恐症開懷大笑 獲黃日華祝賀開心到癲
李珊珊感激鄭秀文、古天樂等好友支持
李珊珊患病期間，在好友扶持下走出陰霾，當中有林保怡、鄭秀文、古天樂及甘比等十分支持她。李珊珊坦言，當時只想找方法醫病，沒有想過是命運安排，因為身邊很多良朋扶持她，反而想過，為何上天會派來這些好友。她說：「我唔知點解修來同船渡或共枕眠，遇到一啲朋友，喺我最黑暗難行時候扶我，我覺得自己幸運，最大財富係朋友，如果呢個階段無這班朋友，我估我過唔到！一個人有問題，未必自己可以解決晒，或者要行出困局，終歸要靠自己，呢個係事實，張家輝條片講得好實牙實齒，解決問題係一個方法就係自己。呢個基本要做到，如果無朋友在身邊係行唔到，睇吓我有無一個時機，多謝返晒所有曾經幫過我嘅朋友，無論圈外或圈內，但要有特別時刻、重要場面逐一多謝。」
談到患病治療可有經濟壓力？李珊珊表示自己有基本財富，北京投資物業有斬獲，之後拍拖的對象也有負責任，對她很好會、照顧她，後期亦獲得朋友關照，不同階段有不同助力。
李珊珊作好準備面對負評
李珊珊的身型明顯比以前變得肥腫，她表示，決定復出已做好心理準備面對負面的留言，原本未決定時，心情也有忐忑，考慮自己能否承受，當決定後已有心理建設，將會面對鍵盤戰士也好或客觀陳述事實，亦感謝傳媒刊登第一張報導，感恩超出自己預期，還好大家支持她的舉動。她說：「雖然有haters，但都係集中笑我胖，好似盧宛茵或盧覓雪，但我要澄清，盧覓雪好叻，人哋支筆搵好多錢，又照顧得好自己又識食，對時事有觸覺，所以話我變咗盧覓雪，係『褒』呀！多謝！」
相關閱讀：李珊珊淡出20年曾患驚恐症深居簡出 逆市創業親力親為有3猛男幫手
李珊珊不抗拒找伴侶：要令我有漣漪
生肖屬蛇的李珊珊，當年以比堅尼泳衣上陣，拍攝以「玩蛇」作賣點的瘦身廣告成為經典。談到今年犯太歲的她，今年復出是否想突破自己？她笑說：「我幾鍾意蛇，自己生肖有情意結，個廣告概念係我同代言廣告商一齊諗，話不如整條蛇呀！綵排時發現條白色大蟒蛇好慢，就不如整條生猛啲，就好激進整條過山烏，但效果好好，我同蛇都好有緣份呀。」談到復出後可想拍戲，李珊珊以陳百強的歌詞回應，並謂：「你選擇人，人亦能選擇你。拍唔拍呀？我喺商業角度，我跌唔入佢哋標準入面，因為佢哋以傳統標準，但有嘅話唔會抗拒，主力做好平台先。」
現時單身的李珊珊，對於可想找另一半，她說：「有唔抗拒嘅！首先要令我有漣漪先，因為有一定嘅經驗，唔會隨便有漣漪。」
文：鄺芷瑩
圖：林賓尼
化妝及髮型：阿寶（ig：abc_ahbochan）
