強尼（許博文）、岑樂怡（阿妹）和王頌茵（Kathy仔）認識多年的好朋友，最近終於在ViuTV新劇《弊傢伙！我要去祓魔》合作，首次演超現實題材，他們都話有一定難度，但亦特別過癮。強尼認為是可一不可再的演出，冀觀眾不要對CG技術要求太高，但相信愛燒腦題材觀眾會支持。採訪：杜杜 服裝:Marimekko
3人早在2020年拍完ViuTV新劇《暖男爸爸》後，已得知會開此劇，因是同一監製戚家基，但因疫情等種種原因，直到2023年才開拍，這是強尼首次擔正，得知時當然興奮，「嗰時個反應，嘩！真係㗎！」他們又形容這是可一不可再的組合，強尼續說：「我哋呢個組合難得之外，呢種題材可能一生人得一次機會拍，所以只此一次都此生冇憾。」
啱愛燒腦劇觀眾睇
阿妹坦承最初得悉拍這個題材時，一度好擔心，「我直頭驚，電視劇有咁多CG真係唔夠錢做㗎喎，驚會好肉酸，但當睇劇本就好放心，因為監製太厲害，每個角色都有佢嘅故事，演員好易攞到神髓入局。」本身是動漫迷的Kathy仔能夠參與劇集就特別興奮，「聽到呢個世界觀時覺得好正好玩，好想參與呢件事，本身好鍾意睇動漫，講到靈異嘢我拍過《晚吹—總有一瓣喺左近》，試過去靈探，將2樣嘢放埋一齊，我有種莫明嘅興奮，好容易理解。」
本身冇睇開動漫的強尼，睇到完整劇本時卻好頭痛，「呢個世界喺現實係唔存在，劇本我睇完2、3次，都要畫個人物關係圖出嚟先得，因為入面啲名好難記，好似『玄門正宗辟邪隊組長御前鐵馬』，嗰時未知係柯煒林演，真係唔知點記好。」雖然故事複雜，但強尼認為好啱現在愛燒腦的觀眾，「大家想睇啲好抽離嘅嘢，今次幕後同事好努力去構建呢個世界出嚟，預計啲觀眾一定話啲CG咁㗎？！唔好攞去同英雄片比，喺本地電視劇資源裏面真係交足功課，我哋𠵱家啲觀眾係高階，好多嘢鍾意自己拆，相信呢套劇討論好高，空間好大，啱唔同年齡觀眾睇。」
