王灝兒（JW）近年與友人夾份投資開設飲品連鎖店，更越開越多，現共四間店投入營業，分佈港、九、新界。身為老闆娘的JW，早前趁農曆年臨近，親自落鋪巡視業務，並向員工大派利是，齊齊預祝蛇年行大運兼生意興隆。 文：鄺芷瑩 圖：朱偉彥 場地：茶大椰
JW覺做生意學到人際關係
對於茶飲生意發展，JW表示會專注香港市場，畢竟自己最熟悉這個地方，首先會處理香港業務，並想今年會繼續開分店。她說：「希望今年2025年可以開多三至五間，因為吸納到經驗，舖租不是以前的「癡線」價，依家仲係偏低，希望可以搵到啲好舖頭，有好嘅人流就最Perfect！」
首次創業的JW，坦言學到很多，亦覺得做飲食生意一點不容易，幸好有飲食經驗的生意夥伴，而做一門生意要跟夥伴磋商，覺得跟唱歌很大分別。她說：「我覺得做生意學到人際關係、溝通技巧，仲要識得變通，例如做隻產品出來，原來回響不大，就要諗下應唔應該繼續做呢個產品，還是再諗在冬天、夏天設計一啲唔同產品出來。我好鍾意芋頭，所以係咁同公司講要整個芋頭口味。」JW坦言做生意也經歷好多開心事，原來有人在網上媽媽群組分享茶飲店畀大家，亦大讚飲品健康又不太甜。
不會放棄唱歌
雖然踩入商界，但JW表示不會忽略歌唱事業，不過未有適合時機出歌。她說：「其實2023年底已計劃好2024年的歌曲，但有時唔係我想出就出到，都要睇好多其他因素，所以唯有等時機，我就會將腦海入面計劃好嘅嘢拎出來。」
近年參與劇集演出的JW，坦言也很喜歡拍劇，好想演戲，所以很開心拍到古裝劇，更遇上對手周嘉洛、陳瀅和朱敏瀚，令她感覺很幸福。談到可有想合作的演員，JW笑指劉青雲，更大讚對方演每部戲都有個人特點，令她印象深刻。對於新一年大計，JW表示想投放更多時間在音樂方面，但要等待適合時機，現階段籌備中，因為不想浪費時間；也會在生意上做得更多，可以一直學習不斷向前，亦會找適合的歌曲或作歌，如時間適合便可推出。早前跟卓悅太子爺葉韋彤分手，回復單身的她，被問到可想在新一年有新戀情。她說：「由上一次開始已經決定咗所有嘢低調，我覺得咁樣自己更快樂。」
