由王晶、葉念琛聯合監製兼執導的賀歲片《麻雀女王追男仔》，首度擔正電影男、女主角的馬國明和高海寧，率先預祝大家蛇年「發、發、發」，齊齊行好運，並分享拍攝趣事，感受新年氣氛。文：鄺芷瑩 圖：譚志光
高Ling曾自摸「十三么」
本片除了高Ling、馬明外，還有陳家樂、陳靜、李尚正、許紹雄、林盛斌（BOB）、郭珮文、「新一代魯芬」張錦霞等演出，首度擔正電影女主角的高Ling，飾演保險女王兼天生麻將狂，她笑言現實中屋企沒太多人識打麻將，近年自己先學識，只懂得簡單食糊組合，例如：對對糊、十三么、大四喜，但從未食過詐糊或「蝦碌」變成小相公、大相公，高Ling笑說：「我試過食十三么，係我自摸食糊！剛才有人問我會唔會「鬆章」？我唔識，只識睇自己副牌，仲會砌到靚為止，所以成日鎖住人哋啲牌囉。」
拍打麻雀片段體會工作人員辛苦
為了演繹天生麻將狂，高Ling事前都有睇打麻將片段，學習疊牌等手勢，但她覺得工作人員更辛苦：「佢哋要預備成場戲嘅牌，畀我哋摸牌，摸邊隻牌返來、打邊隻牌出去、再摸邊隻牌返來，完部要計好、排好晒，要花個幾、兩個鐘去研究點擺，試完無問題才讓演員坐底。但啲戲要做得啱，拎到邊隻牌要做乜反應，所有嘢都要有戲！」飾演科學家的馬明，戲中發明好多東西想改變世界、造福人類，奈何只有高Ling懂得欣賞，而戲中的馬明好憎人打麻將，所以跟對方會有矛盾位。雖然馬明笑言今次無打麻將戲份，但就被高Ling踢爆他現實中打麻將好叻，不過馬明就謙稱只是識打：「媽媽抱我時已經喺麻將枱睇住，由細到大都識打，但未至於係叻！新年先同家人打麻將，通常都係輸，賭係無乜運，逢賭必輸。」相反高Ling自認有賭運，皆因試過自摸十三么食糊，贏牌時興奮到影相留念。
以新戲比喻親情
在TVB合作無間的兩人，今次首次合作拍電影，高Ling大讚同馬明合作好舒服，大家對戲劇的表達好相似，排戲時經常簡單對稿已理解對方，順其自然去演；馬明就笑言和對方合作感覺得意，只要人物設定及故事不同，大家依然會有火花，又指戲中兩人有場行山戲，互相都加了對白，當講完對白後自然有個停頓位，完全有默契，高Ling說：「有啲戲份我無預期到嗰個位我會感動，但係到嗰陣情緒自然湧上來，呢啲人哋叫『神來之筆』。」馬明透露戲中同高Ling有感情及溫情線，反而搞笑方面則由陳家樂、李尚正擔當，高Ling大讚導演安排得好，令該片笑中有淚及有所啟發，馬明說：「將麻將放在親情度，戲入面麻將就係高Ling同媽媽嘅collection，但我就好憎打麻將。《嚦咕嚦咕新年財》就用麻將比喻人生、親情，越爛嘅牌越畀心機打。」
馬明獲邀做賀歲片男主角：我零票房喎！
對於首次擔正賀歲片女主角，高Ling坦言沒太大壓力，好開心獲王晶及導演葉念琛的邀請，驚喜、興奮又期待，好相信對方的決擇及豐富經驗，坦言若後期工作要重新做過、也跟導演說無所謂，最後導演指該片好好笑，並表示很有信心；馬明同樣首任賀歲片男主角，收到導演邀請即諗：「吓！我零票房喎！因為我未拍過電影。」他又指片中各演員戲份也很平均，覺得大家也是主角，但有個機會演出亦即是對他有信心，自己覺得動力多過壓力，感覺有幸參與已很開心。
工作不斷 豐收一年
對於2024年的成績，高Ling坦言是豐盛一年，除了有份參演內地劇及綜藝《無限超越班2》外，亦演出TVB劇《武林》及賀歲片《麻雀女王追男仔》等，還奪得三個女配角獎項，她說：「好感恩，事業越來越好，希望嚟緊做好每份工作，繼續得到大家支持同鼓勵，我會畀心機。」馬明則謂疫情期間好多工作停頓，但去年多返賺錢機會，例如接拍廣告、劇集及參演今次電影，希望蛇年會越來越好。
高Ling衝事業但唔抗拒姻緣
至於單身的高Ling可想新一年找到另一半？她笑說：「馬明建議不如我參加相親節目，但我覺得唔抗拒同強求，命運安排咗好似我呢幾年事業好勁，我會專注事業，若然有日遇到適合的人，當然唔抗拒啦！好多人話會突然出現、你擋唔住，未出現前搵極唔適合，咁不如順其自然！」至於問到馬明與太太湯洛雯（靚湯）可想快生B？他表示隨緣，就算無也不會有壓力，更笑謂太太現在緊張愛貓多過他。高Ling即踢爆指靚湯會遠距離為老公叫外賣，試過馬明變瘦一點，靚湯傳訊息問她馬明是否沒吃東西？於是叫她叫外賣點雙份，高Ling說：「我又唔知馬明乜口味，就要問佢，佢又客氣話唔使！我話唔得，靚湯叫我嗌，佢太太就幫佢揀，我嗌完就同佢講：『你老婆嗌外賣畀你！』佢就會乖乖地食。」
