香港人不少是「投資狂」，任何時候都心癢癢想「買嘢」，包括金股匯，更甚是日日夜夜都有人想買樓，不論是自住還是投資。身邊老友更當我是樓市專家，不停問買得未？
其實任何投資皆存在極大風險，自己必須學習分析形勢，絕不可憑直覺就「舂個頭埋去」，否則十次有九次輸死你。
前舖王「蝕到傻咁」出貨
大家可知道，強如前舖王鄧成波的物業，也在一件件蝕到傻咁出貨，最新的觀塘麗東酒店大出血，冇咗3億幾才甩到手，慘！可能以往香港的「買樓必賺」美夢，仍纏繞不少人心中，故一見樓市下跌就想走去掃。
讓我話你知，可見將來，肯定所有物業，包括住宅、商廈，尤其工商舖，全部冇運行！這與整個經濟大形勢及供求失衡有直接關係，胡亂入市將會買一間蝕一間，絕非投資之道，咪諗喇。
記住有錢唔一定要投資㗎，因一郁手，就可能蝕到返唔到轉頭。反之唔郁，存定期或買各種政府債券，可立不敗之地，邊個更明智，你話呢？
投資與自住是另一個故事
投資物業實屬不智，咁自住又如何？這就是另一個故事了！小弟再三強調，自住樓有如娶賢妻，搵到啱嘅相處一生一世，絕對不可純用金錢來衡量。
因買到一個舒適合心意的單位，入住後人會安寧平靜啲，家庭也會和睦啲，好的居住環境令全家人感情更穩固，個個身體免疫力提高，這並非純以金錢可以計算出來。
我買過幾層樓，凡一入去感覺舒服自然的，即不會大幅議價，只酌量減多少已可。因令人有舒服感覺的樓不多，自住當然好，欲放手時也非常容易。
目前市況正是選擇自住物業的好時機，因新樓多，二手樓放盤者眾，百分百是買家市場（Buyer’s Market），此時不買自住樓更待何時？建議有需要的朋友不要等了，反正如今租金越來越貴，但樓價越來越低，若你決定留在香港，就應該開始物色優質自住單位。
找到合心意的，一於委託地產代理先鍊鍊價，不過切勿太過分，以免失去理想獵物。
資深傳媒人 曾智華
相關文章：
DeepSeek未能擊潰護城河 Nvidia被忽略的本質｜晉佳
