63歲前「亞視一姐」麥翠嫺去年10月動用千萬名車及3對「流星錘」龍鳳鈪嫁女，相當架勢！再加上近日被薛家燕點名，重提33年前購入麥翠嫺老公龔汝華極力游說的中伏縮水舖，累她勁蝕200多萬，至今仍耿耿於懷。突然成為焦點的麥翠嫺公開向家燕姐致歉，強調兩公婆都是受害者，經一事長一智，她保證：「以後會帶眼識人！」麥翠嫺又另爆28年前失7億3T的人生遺憾事。
麥翠嫺曾是亞視當紅花旦
麥翠嫺是亞視邱德根年代力捧的花旦，曾演過《少女慈禧》、《姊妹情》等多套經典劇，及後過檔TVB，婚後淡出照顧一子一女，直至近年復出客串《家族榮耀》及《太陽星辰》。麥翠嫺坦言有戲癮，都想試下未拍過的題材，正如犯罪推理劇《太陽星辰》搭配住「穿越時空」的元素，好有挑戰性。
麥翠嫺愛追譚輝智廖家爵
雖然已半退休，但麥翠嫺仍然緊貼娛圈：「我會睇啲吸引嘅劇集，比如黎耀祥主演嘅《巾幗梟雄之懸崖》，當年我哋合作過《射雕英雄傳》，尤其鍾意睇佢喺《西遊記》中做『豬八戒』，好抵死及搶戲。」麥翠嫺越講越興奮，更笑住自爆會追『鮮肉』：「『最佳男新人』我投咗譚輝智、廖家爵，廖家爵高大威猛有型，我幾睇好佢；譚輝智幾可愛，而且我認識佢爸爸譚握籌，我覺得佢哋可以走性格路線，當年自己都係有性格，其實我唔鍾意靚仔，靚仔未必有戲味，最重要吸到眼球。」
麥翠嫺自嘲失億富婆
對於被封「3億富婆」，她即耍手否認：「梗係唔係啦！大家開心吹下啫。」她解釋，當日向朋友借來名車，為囡囡龔敏晴搞夢幻婚禮留為紀念，因而被傳媒計算名車總值，然後加上該稱號：「我又唔能夠話朋友啲車唔值錢，大家講下笑就得。(咁實際有多少億身家？)自己年紀咁上下，變咗失憶呀，哈！」她又自揭1997年時真的失了「億」：「當年回歸盃3T彩金高達7億，我同一班生意朋友圍咗頭關，第2及第3關由我揀，因為正值大肚會比較旺，第2場我揀咗10號，點知開跑前老公信貼士，改咗馬飛變11號，結果真係由10號跑出，雖然第3關都中埋，但當年第2關斷咗纜係冇錢收嘅！見財化水嗰刻只能冷靜，自我安慰話『算啦，唔係就唔係你，當失憶！而且男人有錢就作怪，可能中咗3T我冇咁幸福呢…』呢單成為我人生遺憾事之一，所以呢張馬飛仍然保留住。」
麥翠嫺帶眼識人不被利用
至於人生另一件遺憾事，就是多年前買縮水舖事件：「自己都係畀發展商利用嘅受害者，唔見咗好多錢同時，仲因為牽連到朋友，損失咗友誼，就算當年兩公婆喺番禺一個慈善活動上見返家燕姐，都係尷尷尬尬打個招呼。」麥翠嫻希望家燕姐明白她都是一個被騙角色：「發展商利用明星效應嚟吹捧銷售，手法好差，而且當年冇商舖實用面積嘅規管，小業主得唔到保障，但無奈『伯仁卻因我而死』，加上當年家燕姐被離婚，面對雙重打擊係好難受，希望佢釋懷啦。」永遠記得這件事的麥翠嫺透過《星島頭條》公開向家燕姐道歉求原諒，她雙手合十說：「好抱歉！真係好唔好意思，我會帶眼識人，唔會再畀奸商利用，打後都唔敢再買舖。」她又祝福家燕姐獲家人愛錫，子孫成群繼續幸福快樂，日後越來越好。
採訪：方騫平
攝影：林賓尼
場地：hotel icon the market
