ERROR成員郭嘉駿（193）性格率直敢言，曾被封為「娛樂圈清泉」，因此惹來不少Hater批評，不過面對Hater，193都毫不畏懼經常會公開還擊。日前，193在叱咤頒獎禮上「捧蛋」冇獎拎，有網民就批評他：「其實193首首歌都西口西面係想點？」直指193於觀眾席上目無表情，而193就爆seed 反擊。
郭嘉駿愛據理力爭
193親回網民︰「如果你有機會坐喺度就會明㗎啦，否則都係，關你咩事呢毒X」，同時更轉發帖文謂︰「開場前先話，以後所有頒獎禮都要戴黑超先得」；不過，該網民繼續追擊193指：「你唱歌咁難聽，連歌手席都無資格坐」193就當然不甘示弱，寸爆表示：「咦，但係我真係坐緊喺度，毒X係接受唔到現實嗎？」續表示：「年年都冇獎攞㗎啦，你覺得咁樣就攻擊到我嗎？我賺到錢買跑車買我自己鍾意嘅嘢就已經開心滿足㗎啦，咁你呢？係咪好叻㗎？講嚟聽吓等我開心吓。」該網民又再次寸193冇獎攞，表示：「坐係（喺）度岩（啱）晒你 ，你永遠唔係企係（喺）度攞獎果個」，193 以長文回覆：「嗱，首先同你講聲我喺自己公司頒獎典禮係攞過獎嘅，你可以學吓用Google搜尋一下。第二就係呢，其實你都一樣係坐喺度，只不過你坐喺屋企打字，而我就坐喺頒獎典禮歌手席度睇show咁解，所以正確啲嚟講，我哋兩個坐喺度嘅高度都完全唔同。再者，你覺得話我坐喺度係攻擊到我嗎？講真，我坐咗咁多年你覺得我介意嗎？你有咁多時間去憎恨一個人，不如試吓去諗吓自己點解咁廢，然後努力啲好過啦，加油兄弟，我要去做嘢了，唔能夠做你人生導師咁耐」。
該網民又再反駁：「講緊叱吒（咤）你又講其他，自己公司個個都有獎攞啦，viu自己慢慢打X機啦。」193亦忍唔住再反擊：「如果你話自己公司個個都有獎，咁你就得罪緊好多藝人啦。每年啲獎就係得咁多個，總有好多人攞唔到獎，同埋我哋係公開投票結果嘅，有咩唔識就可以Google學一下，唔係淨係X噏，都要增進下自己嘅眼界見識，同埋點解淨係講緊叱咤？我每個show都係咁嘅樣㗎喎，你呢？你連樣都唔夠膽post係咪因為好怕自己網上嘅言論會被身邊嘅同事朋友笑呀？定係你現實世界根本冇朋友所以要網上攻擊人去得到認同感咁慘？ 」而該網民就未有再回應。193的言論獲不少人認同，更指他面對網民的心態跟姜濤是兩個世界，更大讚他是「Haters教育家」，而洪卓立加入留言表示：「我唔係想博咩所以留言，但我想講我都畀人鬧過。個個專心嘅樣都唔同，無表情唔代表唔專心唔尊重，我睇陳奕迅演唱會，擘大隻眼啤住佢添。」
