2024年進入年底，標普500指數累積上升26.7%，相比港人關注嘅恒指升幅17.9%為高，雖然表面睇唔似差好遠，但喺美股市場捕捉大升股往往容易得多。美股投資者今年上半年靠主流股份英偉達（NVDA）、下半年靠Tesla（TSLA）都能夠幫助回報倍升，可見今年買入美股仍然係港人對沖香港經濟放緩嘅好方法。
美股料明年下半年才見高位
當然，小弟再睇好美股，回顧今年初時，亦只覺得美股嘅牛市里程走到第一、第二季，事實上直至今年底仍再不斷創新高，趨勢至少喺明年首季持續，實在俾到小弟唔少嘅驚喜。預計明年，美股高位較大機會喺下半年先出現，眼下仍有賺錢空間，甚至係賺錢最容易嘅牛三市況。
本來小弟以為，唔少香港投資者已經全力轉投美股市場，早排同唔少業餘散戶投資者接觸過，即使平日好關注、經常查詢美股嘅朋友，原來佢哋仍然以港股為主、美股為輔。或許只有近幾年才投身股市嘅年輕一代，會主力投資美股或者加密貨幣市場。
至於投資者應否港股、美股、加密貨幣市場分散投資？各個市場嘅研究方式同習性都唔同，就唔建議呢種為分散而分散嘅投資方式，反正美股市場深度充足，加上各種各類行業都有，集中精力同注碼喺同一市場，表現往往較理想。
科技普及化造就新一批贏家
唔少投資者認為美股估值昂貴，股價上升潛力有限，情況並唔係咁樣。投資機會並唔在乎市場估值高低，而係有否行業憑藉科技而跑出。即使喺2022年底，美股估值都比其餘市場貴，仍然有英偉達可以數倍爆升，好多憑藉AI跑出嘅股份喺途中被捕捉。美國就係有不斷發掘科技嘅能力，只要有新科技由開發階段進入普及化，就會有一批新嘅股份成為贏家。當然，港股市場背靠祖國，亦可以出現類似機會，但至少他朝美股提供嘅機會絕對唔會比港股少吧。
況且，目前仍然睇唔到長遠有邊個市場能夠取代美股，成為全球最強、大量吸收資金嘅樂園，喺呢個美國嘅對手出現之前，美股仍會係理想嘅投資地，係不爭嘅事實。
相關文章：
皇馬簽名會爭議：貴飛、吉位、混亂安排 與香港活動的警號｜梁偉聰
