文雪兒於劇集《異空感應》及《黑色月光》中演技大爆發，就算只是做阿媽都好搶戲，能過足戲癮的她卻宣布「退休」，除暫別幕前，原來去年一併賣走美甲店王國，現在文雪兒無牽無掛做「專業婆婆」湊孫，好好享受人生，但她戴定「頭盔」補充：「第時有好劇本，唔排除又會心癢癢呢！」 採訪：方騫平 攝影：林賓尼
劇集《異空感應》中文雪兒和陳家樂演兩母子，文雪兒大讚當時正值熱戀期的，陳家樂都好乖，能專注演出交到戲：「有場戲佢聽住我向離世老公交代兒子狀況，我想佢再入戲啲，就改用悲傷語調，陳家樂真情流露感動到係咁喊，做到想要嘅效果。」
創立美甲店王國曾賺過千萬
《異空》成為文雪兒暫別劇作，她加入註解：「我冇話以後唔拍戲嘅，所謂『生仔姑娘醉酒佬』，可能有好劇本又想拍都唔奇，咁啱孫仔出咗世，同TVB又約滿，咪幫下個女手囉，自己16歲出道，其實拍戲真係幾辛苦㗎，年紀大唔想太吃力啦。」文雪兒甚至將一手經營的11間美甲店全部轉售：「美甲店經營咗24年，每個股東曾經賺到過千萬，但近年都冇乜錢賺…呢啲都係過眼雲煙。」
64歲文雪兒分享「逆齡」心得：「除咗唔多執著每日感恩外，我冇乜奢求，其實好多開心、唔開心嘅來源係睇自己心態，咁我都鍾意靚衫及珠寶首飾嘅，但如果我奢求10卡巨鑽，老公又冇能力買，咁兩公婆咪會多咗爭吵，所以越容易達到目的嘅，就做人越易會開心。」文雪兒腦海中收藏好多開心記憶：「我仲好記得當年《鹿鼎記》中反串演韋小寶，有個屙尿嘅鏡頭，我就下意識踎低屙，呢個舉動成為片場笑料！」她強調做人好正能量，多年來行中冇死敵，即使當年失婚帶住兩女，都唔會怨天尤人，反而視為動力，做好盤生意提供女兒優質生活。
