MIRROR成員陳卓賢（Ian）今年以故事串連推出的單曲，來到最後一首作品《玩偶奇遇記》，今日（12日）Ian到商台接受節目《叱咤樂壇》訪問，近二百名Hellosss（Ian粉絲暱稱） 擔晒櫈仔，一早到商台外等候偶像。Ian近12時15分乘搭七人車到達商台，見他以白色外套配黑色褲示人，戴上眼鏡，心情大靚，並走近粉絲揮手，一眾粉絲見到偶像都起哄瘋狂大叫，其後Ian便趕入直播室做訪問。
Ian想成為「Hellosss」一點光
歌曲故事來到最終章，揭曉故事中飾演的主角原來是一隻玩偶熊仔，Ian 坦言歌曲某程度是反映自己，「內裏好多思想、好多嘢想表達，自己好清楚嘅，但係唔知點表達出嚟，有種無力感，依靠創作渡過某一啲關口。」他又逐一解讀之前4首歌的鋪排，而MV其中一幕劃火柴，原來是代表光，Ian 表示以往有問自己，如果將來繼續喺呢一行，最想表達到啲咩？「就是對於一路支持、留意我嘅人，我會想成為佢哋嘅光，帶領佢哋離開黑暗。」
他又透露第5首歌《玩偶奇遇記》，原來是4年前一隻Demo，「4年前已經填好詞，嗰陣時Demo名叫做《木偶》，歌詞只係改動咗少少Chorus（副歌）部份，其他都係4年前嘅文字（4年前已經想講呢個故事？）唔係，但可能係內心思維冇變到。」終於完成5個章節， Ian開心表示好爽，「因為初初有呢個諗法嘅時候，唔知執唔執行得好，好多謝團隊一齊合力去做，最難係過程不斷質問自己講唔講得通，人哋會唔會質疑個故事？」
Ian劇透個人專輯有彩蛋
隨即，他預告今個月底會就這個故事，推出一隻mini album 《Interlude》 ，至於為何叫 《Interlude 》 ，他認為雖然故事完整，但未必是一個終結，「我覺得人生每一日都係一個逗號，過緊其中每一個章節，意思就係唔好將啲嘢咁輕易畫上句號，可能只喺你人生裏面其中一個章節。」他更劇透album 會有彩蛋、Hidden track 、有很多驚喜。
早前，Ian 公布明年將會舉行巡唱，他就表示這5首新歌一定會加入巡唱歌單，而巡唱第一站的時間地點及最後一站是否在香港舉行，他就大賣關子表示暫時未定實，更笑言叫大家唔好咁心急。
出道6年，今個月即將推出首張個人專輯，被問到只收錄2024年這5首歌，會否感到很可惜？Ian 續自爆希望下一年可以再出一張大碟：「雙面碟A side 係全新歌，B side 係自己挑選嘅精選歌，（10隻新歌+10隻舊歌，寫都要時間？）OK架夠貨！」他續預告2025第一隻單曲亦已剛剛寫好，將會於一月派台，「今次好唔同vibe 、比較Musical，音樂性強啲，旋律上好特別。」
Ian自覺心態變得從容
聖誕將至，問到有咩聖誕禮物送俾自己？Ian 坦言2024 是非常豐收的一年，「自己好多冇諗過嘅嘢都一一實現，所以今年係好奇妙嘅一年，值得好好紀念。」對於MIRROR成軍6年有咩感覺，Ian 表示：「好似不經不覺6年，覺得同初入行自己想做嘅嘢依然冇變，向前行嗰個心態亦都冇變，多謝大家嘅陪伴；呢兩年自己嘅心態特別變咗，從容咗，早年時候淨係知自己好唔開心，又唔知咩事咁，疏理好之後，而家又好咗好多。」他更以歌曲中的熊仔比喻自己的現況：「而家已經唔孤獨，有個好溫暖嘅環境。」而在訪問結束後，Ian 在直播鏡頭前再劇透首張個人專輯會在12月20號推出。
晚上已聚集近300粉絲在商台外，接近7時，Ian從商台後門離開，臨上車前沿路向粉絲揮手，大家開心歡呼。
