香港時間周四(2024年12月12日)，是U23香港足球代表隊在2009年東亞運動會奪金15周年。當年奪金功臣、港隊前鋒陳肇麒在網上社交平台撰文回味好時光，引來球迷留言及讚賞。
「15年啦，仲攞出嚟講。回味下都得啩。當年嘅輝仔而家都踢到100場代表隊變做輝哥啦。以前睇我哋踢波嘅細路仔而家都變曬大人啦。係呀小型運動會。係呀人哋派二隊。係呀我下年都40喇。#東亞運金牌」港隊前鋒陳肇麒在網上寫文，回味2009年東亞運動會摘金的好時光，並且貼出當年獎牌與球迷分享。
球迷紛紛在網上留言支持，感謝陳肇麒及港隊當年創造傳奇一刻。這場東亞運動會足球決賽，由U23港隊鬥U23日本。港隊被村松大輔士哥先落後一球，下半場去熱刺跟操後坐飛機頭等回港的陳肇麒一上陣即接應徐德帥二傳頭槌頂入，法定時間大家踢成1:1，互射12碼港隊有葉鴻輝救出一球及對手射失，港隊有隊長歐陽耀冲第一球射失，但陳肇麒、陳偉豪、李志豪及黃展鴻射入，結果港隊以總比數5:3贏波，在大球場贏得東亞運動會足球賽金牌，是港隊第一次在大型綜合運動會贏得足球賽金牌。
球迷留言多謝陳肇麒：
「經典，足以回味一世。」
「當年仲係小五係電視睇完，直到互射12碼贏咗真係好開心，永遠都會記得果日亦係睇完之後正式去學踢波。場波影響好大，多謝你比咗美好回憶香港球迷。」
「真係記得你響熱刺操緊坐頭等返嚟下半場仲入埋波…真係冇得頂。」
「永遠唔會忘記呢一日， 係我人生中第一次睇波，會感動到喊。」
「不論幾多年，你們全隊都是當年的英雄，呢件事都係值得回味，多謝你們帶給香港人的回憶。」
說回2024年的港隊，現時正在主場出戰東亞盃外圍賽，周六晚上8時將在旺角場鬥中華台北。由於中華台北剛在另一場以4:0贏蒙古，港隊只是贏蒙古3:0，因此港隊若想踢入12月17日的東亞外決賽，周六這場比賽必需要擊敗中華台北才可成事。中華台北由前港隊主帥加利韋特執教，港隊則有另一英國人主帥韋斯活領軍。
