噚晚美國公布CPI數據，10月核心通脹按月升0.28%，比預期中位數0.31%略低，但未視為減息加快嘅誘因，未足夠構成美股展開新一輪單邊升勢嘅理由。不過，美股連續3個交易日輕微回吐，成交仍保持活躍，屬於好現象，似乎正等待下一個上升嘅理由。
下一個有機會觸發美股上升嘅藥引，就係星期五公布嘅美國零售銷售數據。由於之前美國大選關係，令相關數據改喺今個星期五公布，目前市場預期10月零售銷售按月增長0.2%，預測算保守，有望勝預期，或許會令美股帶來單日利好。
由美國零售業界成立嘅全美零售聯合會（National Retail Federation）噚日公布網上銷售按月升1.84%，實體銷售按月跌0.57%。整體數字按月升0.74%，表現比9月好，由此反映10月美國零售銷售反彈，增加周五官方數據勝預期嘅勝算。
Tesla too good to be true？
至於Tesla（TSLA）上星期係威係勢，今個星期靜落嚟，加上利好消息已消化得七七八八，市場憧憬Tesla行政總裁馬斯克（Elon Musk）加盟華府，不過，假如馬斯克成為美國官員，中國又會唔會咁容易將Tesla自動駕駛FSD放行進華？現價有點too good to be true。
此外，下星期三收市後NVIDIA（NVDA）公布業績，隨住時間推移，話題熱度增加，資金有可能由Tesla轉炒NVIDIA，估計績前幾日，NVIDIA股價會有唔錯表現，假如配合美股向上，績前或許能挑戰160美元，然後再睇睇業績後能否繼續破頂。
晉佳
https://www.patreon.com/user?u=28525578
相關文章：
