前男子組合SHINE成員之一的徐天佑太太Olive Wong在中環九如坊開設護膚品牌概念店，昨日（22日）突然在IG出po稱被電影公司在未獲批準情況下硬闖拍攝，直斥該行為「同強姦其實冇分別」！《風再起時》導演翁子光亦有轉發並說：「有人利字當頭，中飽私囊！」
相關閱讀：黃德斌孖葉童演舞台劇唔排除加場 徐天佑做治療師教身心靈系統課程 導演陳德森都係學生
徐天佑太太店舖被電影公司硬闖拍攝：
徐天佑太太Olive Wong昨日在其護膚品牌概念店的專頁撰長文，聲稱「限時傷心post分享」：「話說早前有電影公司聯絡九如坊店，想借用我哋場地拍攝某某賀歲片，我哋清晰回覆佢哋需要逐小時計的租場費用，以及如果有任何損毁都需要佢哋負責，佢哋回覆咁佢哋嘅器材工作人員唔會入嚟，只係演員入嚟兜幾個圈好快就出返去，我哋回覆都需要借用場地1小時嘅費用，因為冇共識所以我哋就沒有多加理會。」徐天佑太太稱昨日同事見到店外門口set好機，工作人員、演員等等準備就緒，在店外拍了一段時間：「店內其實有客人做緊Facial休息緊， 同事即刻出去交代清楚唔可以入嚟我哋店內，我同佢哋講『如果佢哋拍出邊我哋都冇辦法啦』。」
結果竟然發生不愉快場面：「突然工作人員放低咗個對講機喺店內門邊，兩位演員無啦啦走咗入嚟兜幾個圈，個對講機突然勁大聲向演員發出指令，演員又好大聲咁講對白。大佬！我哋上面有兩位客人休息緊㗎！店內工作中嘅同事完全反應唔過來，之後佢哋又再次入嚟做同一樣嘅事，有crew仲要話我哋同事影佢哋相，搞到我啲同事好驚。係，成件事其實只係短短10分鐘，但呢10分鐘嘅『夾硬嚟』同強姦其實冇分別。」
徐天佑太太還說：「我哋已經前前後後好多次講過唔可以入嚟拍攝，平日我哋有無數人入嚟影相打卡，我哋會好開心嘅，但今次事件完全係商業用途，在商言商，就係要計數，我哋打開門做生意，每天交着高昂嘅租金人工水電媒，你哋請個臨記都要封番封利是啩？！點解可以咁過分嘅？有冇禮貌㗎？有冇程序㗎？」最後她只這間製作公司的名並説：「套戲我唔知係邊套，話係賀歲喜劇，我亦都唔想講明係邊位演員，因為其實唔關佢哋事，這樣的製作團隊，難怪港產片每況愈下。」
徐天佑出身於組合Shine：
徐天佑太太稱不涉及「拍完唔啱數」
事件隨即在網上掀起熱話，有人說：「畀一個鐘租場都畀唔起，要咁厚面皮夾硬拍，應該要開佢哋名，唔係既會整臭香港電影個名，應該互相尊重。」、「記得keep閉路電視記錄，有乜事都有證據。」、「真係唔知點解永遠拍嘢嗰班人，次次喺街都要擺晒款，老馮覺得霸住條路係啱，仲要覺得啲行人阻住佢哋。」甚至有人問：「點解唔阻止佢？企幾個人喺度咪得？再唔係報警？冇主角喺度嘅相做證？似拍完唔啱數多啲。」徐天佑太太亦有回覆：「已阻止（但夾硬入嚟）/同事有工作崗位（小店只得2個sales)/報得警來佢哋已經走咗/有主角照片及CCTV片， 但唔想造成無理網民騷擾演員，所以這一刻選擇唔po‧。因為問題及責任在製片及製作團隊/所有條件在拍攝前清𥇦交代，佢哋不願意付租場費用，所以我哋唔畀佢哋入店拍攝，簡單如此，不涉及『拍完唔啱數』。」
導演翁子光稱有人利字當頭中飽私囊
《風再起時》導演翁子光亦有轉發並說：「香港拍戲總是預算有限，明白的，為省錢可以做很多說起來羞澀的事，可能是為了電影的製作著想，但是某電影製作公司，以拍攝本地製作為名，製作成本左慳右慳，結果是有人利字當頭，中飽私囊，肉眼可見的把製作做到尷尬的因陋就簡，而且這種短視的作風，仍可長年不停有新片推出，香港電影業形勢嚴峻，為拍好戲而努力的心，相信其實就是良知，以我所知知、也感動於香港電影工業九成人都是有這底線的，希望極少數（甚至是一間）這類製作單位不會影響香港電影工業的形象。」
其他文章：
40歲歌手英國回流變「身心靈療癒師」！初階學費每位XXXX元 已開近百課堂
