「今晚8點半你會做啲乜？」先此聲明不是幫任達華賣廣告，真心想提提大家，今晚8點半開始TVB翡翠台兩線劇絕對精彩，踏入台慶月兩套台慶劇《巾幗梟雄之懸崖》、《廉政行動2024》一齊登場，好戲當前自然要約定你，坐定定在電視機前等開場。
假如你以為TVB台慶，獨沽一味「賣」劇集，只可以話「你太年輕了」。其實TVB耍家的又豈止劇集一瓣，今年台慶綜藝節目有8個之多招呼觀眾。上星期五播出的宣傳片有詳細介紹，計有︰王牌節目《獎門人台慶感謝祭》、《中年好聲音3》、載譽歸來的《Grand住去大阪》，全新製作的《呃錢》、《戰場上》、《與天地對話》、《自駕德島》，電視電影《尋夢琴澳》。播出時間橫跨周一至日，每日總有一套在左近。
除了《獎門人》、《中年》、《Grand住去》這些由來已久的IP之外，到底其他葫蘆賣甚麼藥亮點何在？就等筆者跟大家分享一下。首先今晚10點半率先登場，是蕭正楠、區永權、李旻芳、梁敏巧主持全新節目《呃錢》，聽節目名就知是以真實騙錢個案為基礎的案件重演，外景配上劇集形式播出，令觀眾輕易拆解騙徒的手法，另一賣點是由王牌收視節目《東張西望》幕後班底全力打造，自然睇高一線。
重量級電視電影
講到心水當然是電視電影《尋夢琴澳》，計落TVB已經有20年無製作同類節目，今趟崔護重來動用到3位視帝陳展鵬、譚俊彥、馬國明坐鎮，女主角有近期大熱的張曦雯、視后胡定欣，加上唯美拍攝手法，肯定令人賞心悅目。選擇又豈止那麼少，有另類旅遊節目《與天地講話》，參與藝人份量十足，有闊別幕前7年再亮相的余文樂、姜皓文、蔡思貝等，最特別的一位嘉賓阿Bob林盛斌，他搞笑講爛gag大家見得多，今趟他敞開心扉跟天地靈性對話，探討「人生為何而活」、「你信命運」等哲理問題，下個月20日有得睇。
嫌上述節目要等，11月4日最佳女主持黎芷珊主持的《戰場上》登場。她深入烽火戰場烏克蘭、以色列及巴勒斯坦，以第一身探索戰場上的事和情，透過第一身視角探討當地人如何在戰火消磨下，仍能堅毅地過滿載希望和情義的日子。
