商台DJ阿檸（薛晉寧）繼2019年《無法成長的我們》和2022年《無法誠實的我們》後，再自編自導自演舞台劇《無法承擔的我們Still Y》，更搵來周國賢（Endy）及戴玉麒（Yukki）齊挑戰喜劇。訪問當日要Endy及Yukki分飾瘋狂Fans和偶像，表現均入型入格。採訪：杜杜 攝影：朱偉彥 化妝:Theresa Chan 髮型:Eve Chiu(Endy)、Theresa Chan(阿檸&Yukki)
阿檸第3度以「無法」為主題創作舞台劇，反映成長面對的課題，「嚟到30幾歲，面對承擔責任嘅問題。」搵Endy和Yukki，因兩人跟「堅哥」和「Bye Jacket」有共通點，「『堅哥』係好有膊頭咩都孭晒上身，仲有份硬頸，Endy畀我感覺都係有啲硬頸，而Yukki嘅偶像外表及對表演嘅堅持都似角色。」
Endy即場扮癲狂Fans
Endy演的「堅哥」為擔起頭家，與阿檸經營出租膊頭的「膊頭哥」，他笑言聽到邀請已立即應承，「最近都冇乜點做劇場，對上兩次角色比較沉重，又要喊，今次鬧劇啲，觀眾比較少見我輕鬆啲搞笑啲，都想有耳目一新感覺，佢哋話我第1日排練唔出聲，企埋一二邊，𠵱家先知我傻傻哋，我係幾啱做喜劇。」而阿檸演的「謝博」，是個愛「卸膊」的人，但為了夢想就有份堅持，他笑言：「我同角色都幾唔似，因為我唔卸膊！」
Yukki飾演選秀節目《全民在sing》初代亞軍而爆紅的偶像，由於招牌動作是除外套拋落台，因而被尊稱「Bye Jacket」老師，他即場示範招牌動作時，兩個拍檔即主動扮演狂迷，Endy特別投入，難得一見佢玩到癲，好搞笑。2019年浸大電影學院表演系畢業的Yukki，原來曾報名參加《全民造星V》，「屋企人幫我報名，可惜我去咗外地工作，參加唔到面試，都覺得幾可惜㗎！」
