今期標題會否得罪很多人？可能會，但這正是小弟對60歲以上小投資者的誠心忠告。除非你有幾十億身家，根本唔稀罕1年幾千元「穩如泰山」的利息，否則若你又話要投資，但又唔投資毫無風險必賺兼跑贏通脹的銀債，根本自相矛盾！
恕我用較尖酸的形容，因為實在極緊張身邊朋友的「財務安全」，好驚佢哋又貪又無知下，被人呃去棺材本！香港如今騙子如麻，合法與非法的比比皆是，而且數目在高速增長中！
銀債已發到第9期，期期都有N咁多老友問：「碌Sir，應唔應該認購，買幾多最啱？」答咗8年，你唔攰我都攰，不過仍是要答，因對各位老友影響深遠。
毫無風險必賺4厘息
銀債一如政府年金，政府點解要搞呢？正正是為保障長者的財務安全，故曲線貼錢又派錢，鼓勵長者將錢存放最安全地方，然後逐個月當出糧般連同利息取回。
年輕人漫漫長路，慢慢自己先交學費理解乜叫理財，但個別長者教育程度低，更可能日漸失智或失去活動能力無法理財，故此政府有責任出手相助！
咁點解要買銀債呢？答案是呢個世界，只有銀債是零風險，利息高過定期，但又可以拎錢出嚟隨時唔玩，呢種無downside（缺點）的投資，全世界只此一家，由冇負債又坐擁幾萬億的特區政府發出，等於派錢，點可以唔要咁「豬頭嘜」？
坐底買20萬 截購日郁手
咁應該申請幾多？答案是有錢就去盡！20萬起跳，加到30萬博一博亦無妨，到最後申請日10月14日才郁手，現金只鎖死不足2星期，除笨有大大的精。
至於買銀債最佳策略？答案是年年買，基於3年就會滿一期，收到的錢立即再買，如此你去盡應有超過60萬銀債，每月穩收千幾蚊利息，唔似買股票提心吊膽，擔心跌價、停牌、公司執笠……
大家若有留意財經消息，應知道港鐵公司（066）發行45億元綠色債券，利息雖只有2.75至3.05厘，但市場反應熱烈，錄得超額認購3.4倍。
國際財經專家叻過你同我N倍啦，利息少過銀債的4厘都要搶，你有超過4厘唔申請，係咪「豬頭」呢？
資深傳媒人 曾智華
相關文章：
