呂爵安 (Edan) 與陳凱詠 （JACE）早前首度合作，推出合唱情歌《漸漸我們》，二人今日（26日）到電台接受《叱咤樂壇》節目訪問宣傳新歌，而在商台門外，近二百粉絲無懼正午34度高溫，一早在電台外守候，場面超墟冚！Edan 與JACE 12點25分抵達商台，Edan 以一貫冬天look 示人，白色T恤外面配厚厚的長褸及黑色長褲，而JACE 就以白色吊帶打底衫，配杏色西裝褸示人，雖然時間緊迫，但二人落車後亦特登從後門走去正門與粉絲揮手、派心，全程笑容燦爛，期間Edan 突然擰轉身整理褲頭，原來皮帶還沒扣好 ，相當搞笑。
Edan與JACE為早前的拉闊演唱會，特別度身打造了合唱歌《漸漸我們》，更在拉闊舞台上首度演繹。二人在音樂上首度合作，Edan 坦言是在今年初得知有演唱會後，便生起念頭主動邀請JACE 來首悲慘情歌，並深情演繹一對過氣情侶。訪問中，JACE 大談如何投入歌詞，不過期間卻被Edan 借位嘲笑，JACE 表示在錄音時，幻想的情景是二人生活上有很多不合，並說錯了經常需要兩個人去陪伴，向來轉數快的Edan立即表示：「你需要兩個人去陪伴，做男朋友真係好難接受，你需要我陪伴咪得囉，仲要兩個人」被寸的JACE 即大呼：「呢個人轉數快到，我真係唔醒神啲都招架不住，所以我哋要分開錄音。」
JACE更大爆拍MV 的趣事，「除咗忍唔住笑，我係忍唔住嘔，拍嘅時候我話唔好意思，好似有啲唔舒服，跟住真係去咗嘔 (Edan：可能佢望到導演）」JACE 續指：「嗰日好早拍攝，之前嗰日先落機返嚟，加上少少腸胃炎 ，(Edan：唔怪得拍嗰陣我聞到浸味）」Jace 即無奈笑言：「想做隻同你隻揪嘅歌。」原來，MV初步的構思，導演有提議過JACE 上演喊住揸車，而Edan 就係後方追上，Edan 笑言：「如果JACE 要NG 喊幾次，我咪要不停跑好多次，所以我ban咗」。
Edan 表示這首合唱歌在籌備上都要不斷調整，譬如首歌想在拉闊音樂會前推出，不過卻遇上MV未拍，及二人各自亦剛剛出了新歌，所以想了很多不同方法去宣傳，他更表示：「特登喺Calendar度mark咗，聽日出咩post、打咩caption 、要講漸漸咩等等（謝茜嘉：我可唔可以入你Calendar睇吓有冇一日係出漸漸的黑圖）」說到這裏，JACE 亦即大讚Edan 超級well plan，就連對marketing的事都會諗得好仔細 ，Edan 即搞笑謂：「可能好過做歌手」；而Edan亦表示三年前與JACE 一同主持節目《激安百貨》時已經好欣賞她，「好少人可以跟到我嘅轉數，佢口齒伶俐、反應又快，完全見到自己嘅影子，哈哈。」同時他亦預告即將會有一個小project宣傳這首歌。
Edan 自言是理性人
被問到今年目標及MIRROR 小組進度如何， Edan表示：「我嗰組就7788 ，其他組別就如火如荼，但係首先係會出團歌先 （自己solo嘅歌呢？ ）solo嘅歌就十劃都未有半撇，所以而家籌備中，揀緊歌，今年目標係10月出多一首歌。」他更大賣關子年尾會有驚喜給大家。而JACE 則表示在這段期間已經寫了很多歌，即將會有歌曲跟大家分享。
新歌主要講及一段感情，問到二人的愛情觀，Edan 自言是理性人，相反JACE 則坦言是不太理性，「尤其是拍拖時，好容易唔見咗自己，直至覺得係絕對冇轉機、內傷處理唔到。」訪問尾聲，謝茜嘉叫二人為這首新歌來個一分鐘的劇場版，二人即時入戲，相當搞笑。大約下午五時，二人完成所有訪問後離開商台，並走向粉絲揮揮手，不過就未有簽名收禮物，記者問道是否忘記了扣皮帶， Edan笑笑口表示：「食完嘢之後緊得滯鬆開咗，落車唔記得整返」在旁的JACE 即笑謂會帶領出一個潮流 。
