![](https://media-proc.singtaousa.com/photo.php?s=https://media.singtaousa.com/wp-content/uploads/master/2024/08/2024081021380867827.jpg&f=jpeg&w=815&q=75)
柏度尼圖突然喺周五晚爆出即將加盟車路士,仲Here we go埋!根據報道係大約6,000萬英鎊左右嘅價格,成為新藍軍右翼!能力上技術唔需要懷疑,最主要擔心都係傷患問題。
原來呢單轉會一早有啲玄機,尼圖喺4個禮拜前已經喺隊長列斯占士社交媒體上留言,再加上有消息指出著名經理人文迪斯一路想保密呢一單協議,令到傳去利物浦頂替穆罕默德沙拿由可能變成不可能。
善打右翼嘅尼圖速度快,已經有5個賽季喺狼隊,表現可以話直頭係一個Star,上季交左2個入波9個助攻,季初嗰段對愛華頓、水晶宮同利物浦就一共交出4個助攻,顯示到佢創造機會嘅能力,雖然唔係一個擅長串連嘅球員,但係單打獨鬥真係非常之強,左腳高速壓落底線再去傳中或者轉返大位射門都同樣純熟。
咁佢當然亦有令人擔心嘅地方,就係傷患問題依然困擾咗好耐,上一季大腿底嘅長期傷患係最大鑊,一共傷左125日,對於一整個球季絕對係麻煩事,啱啱打起就即刻傷,而且膝頭哥同肌肉等嘅部位全部都曾經傷過,希望佢可以盡快擺脫傷患。
呢單收購都係強化返車路士嘅右翼位置,同位置有馬度基,相信2人絕對會有一番嘅龍爭虎鬥。Willhappy