馮允謙（Jay）將於今年10月9至11日，於紅磡香港體育館舉行第二次個人演唱會《the SOUNDTRACK of my LIFE 馮允謙演唱會2024》，三年內舉行三次個人演唱會，Jay表示非常感恩，並透露今次紅館個唱是歷來最多樂手，甚至是去年紅館個唱的兩倍人數。
Jay回想過去的個唱有很多難忘回憶，他說：「我真係好幸福，連續三年都可以每年開騷，前年喺九展StarHall舉行我第一次個人演唱會，舞台設計成『J』字，係我好想擁有，代表Jay嘅舞台。」至去年首次紅館個唱，Jay說：「第一次踏上紅館舞台，好多唔同單位合作，包括Promist and Michael，非常震撼，我一直都好想同Promist 呢個合唱團合作，好鍾意呢種澎湃嘅感覺。」他預告今年十月第二次紅館演唱會將更精彩，他肉緊地說：「今次由Randy做Band Leader，而且我哋嘅Band係double咗個size（雙倍樂手），音樂上有好多嘢玩，非常豐富。今年我會出唱片，有啲新歌將會喺今次紅館演唱會第一次唱，所以我非常期待。」
據悉，今次演唱會名字「the SOUNDTRACK of my LIFE」由Jay親自創作，他說：「因為回望返係一個milestone（里程碑），人生就好似一套很長嘅電影，電影就一定會有配樂，我有時寫歌會諗到一啲片段觸動到我，勾起啲回憶，我會用呢啲片段去寫成旋律。今次演唱會有好多作品都係我寫，好想同大家分享我嘅音樂世界。」Jay表示每首歌都是他的Baby，所以設計歌單都很傷腦筋，「今次入場一定有好歌，因為我會全力唱。（會否除衫騷肌？）我唔知自己會唔會除，但係我一定會努力操fit手臂，跳舞一定會但未定跳幾多。」
此外，今次演唱會海報由星級創意大師朱祖兒擔任設計總監，夥拍著名攝影師Sam Wong親自為海報拍攝操刀，展現不同面向的Jay。拍攝當日，Jay換了五個造型，其中一件裇衫兩邊袖口設有拉鍊，他拉上後雙手藏在衫內動彈不得，他搞鬼地扮作向工作人員求救，非常鬼馬。
