6月9 日，大致多及有幾陣雨，局部地區有雷暴，日間部份時間有陽光，天氣酷熱。美國公布5月份美國首次申領失業金人數創出19個月以來新高，達到26.1萬人，遠超市場預期的23.5萬，市場解讀為上月假期因素，或令數據有誤差。不過美國大型科企大量裁員，人數超過20萬，喺就業市場惡化下，市場傾向相信息口快將見頂，10年債息回落，甚至喺憧憬減息下，科技股繼續做好，帶動美股隔晚上升。道指升168點；標指升26點；納指則133點。
美國就業市場轉差係不爭事實，無論待業職位跟新增職位同時減少，估計或拖累未來幾個月嘅GDP表現。不過睇返經濟情況較美國更差嘅歐洲，已連續兩季GDP呈現萎縮，某程度上歐元區已陷入技術上經濟衰退，只係衰退程度輕微，加上歐央行指通脹未受控，市場已預期歐央將於6月及7月繼續加息。留意歐洲多國股市已創新高，因為股市永遠超前實質經濟狀況。
美股回升，中概股亦反彈，反映中概股嘅金龍指數隔晚升逾1%，不過阿里(09988)跟京東(09618)升幅不足1%，力度有限。人民幣暫時表現仍疲弱，創出半年低位後未見反彈，拖累A股亦彈唔起，上證目前只係苦守3200大關。創業板指數更因為寧德此龍頭急跌向下，持續向下尋底。
雖然A股表現疲弱，但港股相對表現較強，上月底恒指見過18000水平後，低位反彈1300點，暫時恒指已守穩10日線及20日線，短線反彈仍可持續。只係每日成交少得可憐，遖續兩個交易日成交額不足900億元，咁嘅成交反映入場資金有限，嚟到19000水平已無太多資金肯再追貨，不過向好嘅方面諗，嚟到呢啲位沽壓亦唔係太大。港股嘅成交額愈玩愈縮，連帶IPO活墧亦減弱，上半年港股嘅IPO集資額竟跌至全球第五位，三甲地位不保，可見港股徹底成為棄嬰。港股自從外資大舉逃亡後，暫未見有回歸跡象，講到底係去年內地嘅防疫政策，以及對科企嘅嚴厲監管，已嚇怕外資，令外資對港股信心盡失，無資金入場，令港股死氣沉沉，咁嘅市況更加難吸引資金進場，成交就持續萎縮，惡性循環下，港股前景大家可以預視有幾悲慘。
